एजेन्सी (मड्रिड) – युवा फरवार्ड ब्राहिम डियाजलाई स्पेनिस क्लब रियल मड्रिडले क्लबमा अनुबन्ध गरेको छ । रियलले डियाजलाई २२ मिलियन पाउन्डमा इंग्लिस क्लब म्यानचेस्टर सिटीबाट क्लबमा अनुबन्धित गरेका हो ।
स्पेनका १९ वर्षीय फरवार्ड डियाजलाई रियलले साँढे ६ वर्षको लागि क्लबमा अनुबन्ध गरेको हो । यससँगै डियाज सन् २०२५ को अन्त्यसम्म रियलमा हुनेछन् । उनलाई सोमबार घरेलु मैदान सान्टियागो बर्नबेउमा क्लबका अध्यक्ष फ्लोरेन्टिनो पेरेजले सार्वजनिक गरेका थिए ।
डियाज १४ वर्षको उमेरमा मालगाबाट इंग्लिस क्लब सिटीमा पुगेका थिए । स्टार खेलाडीले भरिएको म्यानचेस्टर सिटीमा डियाजल कमै मौका पाएका थिए ।
स्पेनका यु–२१ का फरवार्ड समेत रहेका डियाजले रियलसँग अनुबन्ध भएपछि रियलसँग अनुबन्ध हुन पाउनु आफ्नो जीवनको सबैभन्दा खुशीको दिन रहेको बताए ।
