काठमाडौं (हाम्रो खेलकुद) – पल्सर सहिद स्मारक ए डिभिजन लिगको दोस्रो टोली सिएमजी क्लब संकटाले आफ्नो खेलाडीलाई मैत्रीपूर्ण खेलका लागि थाइल्यान्ड भ्रमणमा लाने भएको छ ।

लिगमा दोस्रो भएको अवसरमा मंगलबार खेलाडीको सम्मानमा रात्री भोजको आयोजना गरेको संकटाले टोलीलाई बैंकक लाने घोषणा गरेको हो । यद्दपी भ्रमणको मिति भने तय हुन बाँकी रहेको संकटाका अध्यक्ष इन्द्रमान तुलाधारले बताए । लिगमा संकटाले भने १३ खेलमा २८ अंक जोड्दै दोस्रो स्थान सफल रहयो ।

काठमाडौं महानगरपालिकाका मेयर विद्यासुन्दर शाक्यले खेलाडीलाई सम्मान गरेको कार्यक्रममा भने, ‘हाम्रा खेलाडीले क्लबलाई ठूलो सफलता दिलाएका छन् । हामी खेलाडीको भावना अनुरुप बैंकक भ्रमणमा जानेछौं । अब केहि समय भने मोफसलमा हुने नकआउट प्रतियोगितामा केन्द्रित हुनुपर्नेछ ।’

अखिल नेपाल फुटबल संघ (एन्फा) का महासचिव समेत रहेका तुलाधारले संकटाले विदेशी भूमिमा अर्को ठूलो प्रतियोगिता पनि खेल्ने अवसर पाउने बताएका छन् । उनले भने, लिग विजेता सिग्नेचर मनाङ मस्र्याङ्दी क्लबले एएफसी कप खेल्नेछ । लिगका चौथो स्थान सम्म प्राप्त गर्ने टोलीलाई विदेशी भूमिमा प्रतियोगिता खेल्न पठाउने लक्ष्य राखेको छ । त्यसमा संकटाले पनि बाहिर खेल्न पाउनेछ ।

सोही अवसरमा एन्फा अध्यक्ष कर्मा छिरिङ शेर्पाले देशभर फुटबल विकासको लहरका लागि एन्फा प्रयासरत रहेको र त्यसमा स्थानिय सरकारको सहयोग आवश्यकता रहेको औल्याए ।