दिपक बोहोरा, पाँचथर

साविक विजेता सुनसरी ११ लाई २–१ ले हराउँदै ए डिभिजन क्लब सरस्वती क्लब फिदिममा जारी दशौं रुस्लान फाल्गुनन्द गोल्डकपको सेमिफाइनलमा प्रवेश गरेको छ । सरस्वतीको जितमा दुवै गोल विदेशी भिक्टोरले गरे ।

मंगलबार फिदिम माविको मैदानमा सुरुवाती अग्रता लिएपनि अन्तिम १५ मिनेट सम्हालिन नसक्दा सुनसरी पराजित हुन पुग्यो । खेलको आठौं मिनेटमा दिपेन तामाङले गोल गर्दै सुनसरीलाइ अग्रता दिलाएका थिए । उमेश राईको क्रसमा तामाङले गोल गरेका थिए ।

तर ७६ औं मिनेटमा भिक्टोरले गोल गर्दै सरस्वतीलाइ खेलमा फर्काएका थिए । वन भर्सेस वनको अवस्थामा भिक्टोरले गोल गरेका थिए । त्यसको चार मिनेट पछि काउन्टर अट्याकमा गोल गर्दै भिक्टोरले सरस्वतीलाइ अर्को चरण पुर्याए । पहिलो हाफमा निकै आक्रमक सुरुवात गरेको सुनसरी दोस्रो हाफमा दबाबमा परेको थियो । दोस्रो हाफमा सरस्वतीले निरन्तर आक्रमण गरेको थियो । पहिलो हाफमा सुनसरीका गोलरक्षकले भिक्टोरका शक्तिशाली प्रहारहरु बचाएका थिए । खेलमा दुई गोल गरेका भिक्टोर म्यान अफ दि म्याच बने । उन नगद दश हजार प्राप्त गरे ।

खेलाडीहरुले राम्रो प्रदर्शन गरेपनि स्कोर गर्न नसक्दा पराजित भएको सुनसरीका प्रशिक्षक श्याम मानन्धरले बताए । खेल मैदानको अनुभव नहुँदा खेल्न असहज भए पनि जित हात पार्दा खुसी रहेको सरस्वतीका प्रशिक्षक प्रदिप नेपालले जानकारी दिए । पूर्वकै प्रतिष्ठित फुटबल प्रतियोगिता फाल्गुनन्द गोल्डकपको दशौं संस्करणको विजेताले उपाधि सहित नगद चार लाख प्राप्त गर्ने छ ।

फाल्गुनन्द गोल्डकपमा बिहीबारको खेल :

ब्याइज युनिय क्लब रोयल एफ.सि क्लब दार्जीलीङ