एजेन्सी – म्यानचेस्टर सिटीले यूईएफए च्याम्पियन्स लिगको राउन्ड अफ १६ को पहिलो लेगमा जर्मन क्लब साल्केलाई ३-२ ले पराजित गरेको छ । खेलको अन्तिम २० मिनेटमा १० खेलाडीमा सिमित सिटीले अन्तिम ५ मिनेटमा २ गोल गरेको थियो ।
खेलको १८ औं मिनेटमा सर्जियो अगुएरोले सिटीलाई सुरुवाती अग्रता दिलाएका थिए । ३८ औं मिनेटमा घरेलु टोली साल्केका लागि नाबिल बेन्टालेबले पेनाल्टीमार्फत बराबरी गोल फर्काए । पहिलो हाफको अन्तिम मिनेटमा साल्केले फेरी अग्रता लियो । पेनाल्टीमै बेन्टालेबले गोल गर्दै साल्केलाई अगाडी बढाए ।
दोस्रो हाफको ६८ औं मिनेटमा दोहोरो पहेंलो कार्ड पाएपछि सिटीले डिफेन्डर निकोलस ओटामेन्डीलाई गुमायो । वैकल्पिक खेलाडीका रुपमा मैदान प्रवेश गरेका लेरोय सानेले ८५ औं मिनेटमा गोल गर्दै खेल बराबरीमा ल्याए । अन्तिम मिनेटमा रहिम स्टरलिङले गोल गरेपछि सिटीको जित पक्का भएको हो ।
सिटीले जर्मन टोलीविरुद्ध सन् २०१४ देखि हार बेहोरेको छैन । अगुएरोले पछिल्लो ७ खेलमा १० गोल गरेका छन् । उनी सन् २०१९ मा ११ गोल गर्दै शीर्ष ५ लिगका सर्वाधिक गोलकर्ता पनि हुन् । यससँगै साल्केको युरोपमा ९ खेलको अपराजित यात्रा टुंगिएको छ । दोस्रो लेगको खेल १२ मार्चमा इतिहाद रंगशालामा हुनेछ ।
