लिस्बन (एजेन्सी)– पोर्चुगली प्रशिक्षक जोसे मोउरिन्हो पूर्व क्लब रियल म्याड्रिड जान सक्ने चर्चा सुरु भएको छ । मोउरिन्होले रियल फर्कने अवसर मिल्दा आफुलाई खुसी लाग्ने बताएका छन् । यद्दपी रियल जाने सम्भावनालाई उनले अलिहेका लागि भने हल्ला मात्र भएको बताए ।

‘ मैले के भनेको तपाई सुन्न चाहनु हुन्छ । हल्ला त हल्ला हो । रियल, पोर्टो, चेल्सी वा इन्टर मिलान यसअघि जति टोलीलाई हेरे त्यसमा फर्कन पर्दा मलाई कुनै समस्या छैन,’ मोउरिन्होले भने,’ एक पटक काम गरिसकेको ठाँउमा पनि फेरि जान पाउँदा खुसी लाग्छ । तर चेल्सी मात्र त्यस्तो टोली जहाँ म दोहोराएर पुगेको छु ।’

उनले रियलसँगको स्मरण पनि साटेका छन् ।’एकदमै राम्रो सम्झना क्लबसँग रहेको छ । रियलमा काम गर्नु कुनै पनि क्लबलाई हेरे भन्दा फरक र विशेष छ,’उनले थपे,’हामीले यात्राका दौरान राम्रो गरेका छौं । फरक ढंगबाट हामीले लिग जितेका थियौं । हाम्रा कति खराब स्मरण पनि छन् । मैल गल्ति पनि गरे ती अनुभवले मलाई थप जिम्मेवार र उत्कृष्ट बनायो ।’

डिसेम्बरमा म्यानचेस्टर युनाइटेड छोडे यता मोउरिन्हो रियल जाने चर्चा पनि चल्न थालेको थियो । उनको बर्हिगमनपछि युनाइटेडले प्रिमियर लिगमा उत्कृष्ट प्रदर्शन गरिरहेको छ ।