एजेन्सी – स्पेनिस ला लिगा फुटबलमा एट्लेटिको मड्रिडले भ्यालेन्सियामाथि ३–२ को रोमाञ्चक जित निकालेको छ ।

ला लिगा अन्तरगत बुधबार राति भएको खेलमा एट्लेटिकोको जितमा अल्भेरो मोराटा, एन्टोइन ग्रिजमन र एन्जल कोरेराले गोल गरे । भ्यालेन्सियाका केभिन गेमेरियो र ड्यानियल पारेजोले गोल गरे ।

घरेलु मैदानमा निकै रोमाञ्चक बनेको खेलमा घरेल टोलीले अल्भेरो मोरटाको गोलबाट खेलमा सुरुवाती अग्रता बनाएको थियो । ३६औं मिनेटमा केभिन गेमेरियोले बराबरी गोल फर्काएपछि पहिलो हाफ १–१ गोलको बराबरीमा सकिएको थियो ।

दोस्रो हाफको शुरुमै एन्टोइन ग्रिजमनले गोल गरेपछि एट्लेटिकोले २–१ को अग्रता बनायो । ग्रिजमनले ४९औं मिनेटमा गोल गरेका थिए । ७७औं मिनेटमा ड्यानियलले पेनाल्टीमार्फत गोल गरेपछि खेल २–२ गोलको बराबरीमा पुगेको थियो ।

खेल सकिन ९ मिनेट बाँकी रहँदा एन्जल कोरेरो गोल गर्दै एट्लेटिकोलाई ३–२ को रोमाञ्चक जित दिलाए ।

जितसँगै एट्लेटिकोले शीर्षस्थानको बार्सिलोनासँगको अंक दुरी ९ मा झारेको छ । यो जितले बार्सिलोना च्याम्पियन बन्न एक खेल कुर्नुपर्ने भएको छ ।

एट्लेटिको बराबरी वा पराजित भएको भए बार्सिलोना चार खेल अगावै ला लिगा च्याम्पियन बन्ने थियो । पराजित भ्यालेन्सिया ५२ अंक जोडेर पाँचौ स्थानमा रहेको छ ।