बार्सिलोना (एजेन्सी)– बार्सिलोनाका फरवार्ड फिलिप्पे काउटिन्होले लिभरपुल उनीहरुको फरवार्ड मोहम्मद सलाह, साडियो माने र रोर्बेटो फेर्मिनोको कारण मात्र नभई पुरा टोलीनै बलियो रहेकोले सचेत हुनु पर्ने बताएका छन् ।

च्याम्पियन्स लिग सेमिफाइनलको पहिलो लेगका लागि लिभरपुल बुधबार बार्सिलोनाको क्याम्प नोउ पुग्दैछ । लगातार दोस्रो पटक फाइनल पुग्ने लक्ष्यसहित लिभरपुल बार्सिलोनाविरुद्ध उत्रनेछ । यद्दपी बार्सिलोनाका कप्तान समेत रहेका लियोनल मेसीलाई रोक्नु लिभरपुलका लागि पनि मुख्य चुनौति हुनेछ । मेसी यो सिजन निकै फर्ममा रहेका छन् ।

लिभरपुलमा ५ वर्ष बिताएका कोउटिन्होले पूर्व क्लब स्तरिय र मानसिक रुपमा निकै मजबुत रहेको बताएका छन् । ‘लिभरपुल साच्चै उत्कृष्ट टोली हो । मानसिक रुपमा पनि निकै बलियो छ,’ उनले भने, ‘मैले पुरा सिजन उनीहरुको खेल हरेको छु । फरवार्ड र डिफेन्समा पनि उनीहरु सशक्त छन् । हामीले उनीहरुसँग सचेत भएर खेल्नु पर्दछ ।’

लिभरपुलको तारिफमा काउटिन्हो त्यतिमा रोकिएनन् । ‘टोलीमा तीन फरवार्ड मात्र होइन, डिफेन्स र मिडफिल्डमा पनि त्यत्तिकै स्तरिय खेलाडी छन् । उनीहरुका गोलका लागि निकै मेहेनत गर्छन,’ उनले थपे, ‘हामी पुरा टोलीसँग सचेत भएर खेल्नु पर्दछ र हामीले पछिल्लो समय जस्तो प्रदर्शन गर्दै आएका छौं त्यसलाई निरन्तरता दिनुपर्दछ । ‘

अर्कोतर्फ लिभरपुल प्रिमियर लिग उपाधिका लागि म्यानचेस्टर सिटीसँग प्रतिस्पर्धामा छ । अन्तिम दुई खेल बाँकी रहँदा साविक विजेता सिटी र लिभरपुलबीच १ अंकको फरक छ । उपाधि खडेरीलाई तोड्नका लागि लिभरपुलले प्रिमियर लिग र च्याम्पियन्स लिगमा उच्च प्रदर्शनको प्रयास पक्कै गर्नेछ ।