काठमाडौं (हाम्रो खेलकुद)– नेपाली यू १९ टोली म्यानमारबाट बिहीबार स्वदेश फर्केको छ । एएफसी यू१९ महिला च्याम्पियनसिप छनोटको दोस्रो चरणमा भाग लिदै नेपाली टोली घर फर्केको हो ।
नेपालले खेलेका तीनै खेलमा हार बेर्होदै दोस्रो चरणबाट बाहिरिएको थियो ।
अस्ट्रेलियासँग ११–१ को लज्जास्पद हारसँगै छनोटको यात्रा थालेको नेपाली टोली अर्को खेलमा उज्वेकिस्तानसँग ४–० ले पराजित भएको थियो । आयोजक म्यानमारसँगको अन्तिम खेलमा भने नेपाली टोली २–१ ले पराजित भएको थियो ।
समूहबाट अस्ट्रेलिया विजेता र म्यानमार उपविजेताका रुपमा यू १९ महिला च्याम्पियनसिपको अन्तिम चरणका लागि छनोट भएका छन् । नेपाली टोलीलाई अखिल नेपाल फुटबल संघ (एन्फा) का अध्यक्ष कर्मा छिरिङ शेर्पालगायत पदाधिकारीले त्रिभुवन विमानस्थलमा स्वागत गरेका थिए ।
