एजेन्सी – युरोपेली फुटबलको सिजन अन्त्य नजिकिंदै जाँदा गोल्डेन बुटको दौड पनि रोमान्चक बन्दै गएको छ । हाल गोल्डेन बुटको दावेदारका रुपमा बार्सिलोना कप्तान लिओनेल मेस्सी र पीएसजीका युवा फरवार्ड किलियन एमबाप्पे अग्रपंक्तिमा देखिएका छन् ।

मेस्सीले जारि सिजन लिगमा ३४ गोल गरिसकेका छन् । एम्बाप्पे पनि ३० गोल गर्दै उनलाई पछ्याइरहेका छन् । तर फ्रेन्च कपको फाइनलमा रातो कार्ड खाएपछि एमबाप्पेले तीन खेलको प्रतिबन्ध बोकेका छन् । यसले मेस्सीको गोल्डेन बुटको आकांक्षामा फाइदा पुग्ने देखिएको छ । एमबाप्पेले प्रतिबन्ध लागेको तीन मध्य एक खेल खेलिसकेका छन् । अब दुई खेल प्रतिबन्धमा बस्नुपर्ने एमबाप्पेले त्यसपछि सिजनको अन्तिम दुई खेल खेल्न भ्याउनेछन् ।

यता मेस्सीले भने लिगअन्तर्गत अझै तीन खेल खेल्न बाँकी छ । तर बार्सिलोनाले लिग उपाधि जितिसकेको र च्याम्पियन्स लिगमा पनि प्रतिस्पर्धा गरिरहेका कारण मेस्सीले सुरुवाती रोजाईमा खेल्ने सम्भावना निकै कम छ । मेस्सीले अहिले नै ४ गोलको अग्रता लिएका कारण उनको गोल्डेन बुटमा बलियो दावेदारी देखिएको हो ।

तेस्रो स्थानमा इटालियन क्लब साम्पडोरियाका भेट्रान फरवार्ड फाबियो क्वाग्लीआरेल्लाले २३ गोल गरेका छन् । सर्वाधिक गोलकर्ताको सुचिमा क्रिस्टियानो रोनाल्डो अन्य ५ खेलाडीसहित संयुक्त चौथी स्थानमा छन् । रोनाल्डोसँगै करीम बेन्जेमा, दुभान जपता, लुइस सुआरेज, रोबर्ट लेवान्डोस्की र मोहमद सलाहले समान २१-२१ गोल गरेका छन् ।