काठमाडौं (हाम्रो खेलकुद)- भ्याली च्यासल युथ क्लब दोस्रो संस्करणको रोज बहिनी चन्द्रागिरी गोल्डकप फुटबल प्रतियोगिताको च्याम्पियनबनेको छ ।
चन्द्रागिरी नैकापस्थित नैकाप फुटबल मैदानमा आइतबार भएको फाइनलमा च्यासलले ‘ए’ डिभिजन प्रतिद्धन्द्धी सरस्वती युवा क्लबलाई २–० ले पराजित गर्दै च्याम्पियन बनेको हो ।
च्यासललाई च्याम्पिउन बनाउन वैकल्पिक खेलाडी म्याक्सवेल एलोन र जुनियरले गरे । म्याक्सवेल दोस्रो हाफको सुरुमै अर्मान्डको स्थानमा मैदानमा प्रवेश गरेका थिए ।
निकै नै प्रतिस्पर्धात्मक बनेको खेलको पहिलो हाफ गोलरहित बराबरीमा सकिएपनि च्यासलले दोस्रो हाफमा दुई गोल गर्न सफल भयो ।
५५औं मिनेटमा म्याक्सवेलले हेडमार्फत सुन्दर गोल गर्दै च्यासललाई सुरुवाती अग्रता दिलाए । ७१औं मिनेटमा जुनियरले गोल गर्दै च्यासललाई च्याम्पियन बनाए ।
त्यसअघि खेलको दोस्रो मिनेटमा नै अमिर श्रेष्ठको प्रहार पोस्टबाट थोरै बाहिरिदा अग्रता लिनबाट चुकेको थियो । ११औं मिनेटमा जुनियरको प्रहार पोस्टबाट थोरै बाहिरिएको थियो । १४औं मिनेटमा जुनियरको पासमा अर्मान्डले छोडेको बलमा मिलन राईले फितलो प्रहार गरे । १५औं मिनेटमा ओको बोताको फ्रिकिक क्रसबारमा लागेर फर्कदा रिवाउन्डमा अमित लामाको प्रहार अकासिएको थियो ।
१९औं मिनेटमा सुजित बुढाथोकीको प्रहार गोलरक्षक दिपेश थापामगरले मुस्किलले बचाए । २८औं मिनेटमा छिरिङ गुरुङ कर्नरमा अर्मान्डको हेडर बाहिरिएको थियो । ३९औं मिनेटमा दिपेश श्रेष्ठको प्रहार बाहिरिएको थियो ।
६१औं मिनेटमा राज शाहीको फ्रिकिक डिफ्लेक्ट हुदै बाहिरिएको थियो । लगत्रत्तै प्राप्त कर्नरमा रमेश घिसिङले क्रस गरेको बललाई राज शाहीले प्रहार गरेपनि क्रसबारमा लागेर फर्कदा सरस्वतीले बराबरी गोल गर्ने मौका खेर फाल्यो ।
६३औं मिनेटमा सरस्वती १० खेलाडीमा समेटियो । विशाल मगर दोहोरो पहँेलो कार्ड खादै मैदान बाट बाहिरिएपछि सरस्वती समस्यामा परेको थियो । त्यसपछि थप गोल हुन सकेन ।
च्याम्पियन बनेसँगै च्यासलले ६ लाख रुपैया पायो । दोस्रो भएको सरस्वतीले ३ लाख रुपैया पायो ।
च्यासलका कप्तान अमिर श्रेष्ठ प्रतियोगिताको सर्वाेत्कृष्ट खेलाडी चुनिए । उनले ३० हजार रुपैया पाए । यस्तै च्यासलकै अर्मान्ड र मिलन राई सर्वाधिक गोलकर्ता भए । उनीहरुले १५–१५ हजार रुपैया बाँडे । दुवै खेलाडीले प्रतियोगिताभर दुई गोल गरेका थिए ।
प्रतियोगिताको विजयी खेलाडीलाई राष्ट्रिय खेलकुद परिषदका सदस्य सचिव केशव कुमार विष्ट, आयोजक दीपशिखा युवा समूहका अध्यक्ष रवि बुढाथोकी र प्रतियोगिता संयोजक रमेश बुढाथोकी, मुख्य प्रायोजक रोज बहिनी सिर्जनशील समूहका अध्यक्ष माधव भन्डारीलगायतले पुरस्कृत गरे ।
१५ बैशाखबाट शुरु भएको प्रतियोगितामा आयोजक दीपशिखा युवा समुहसहित विभिन्न ८ टोलीको सहभागिता रहेको थियो ।
