भरतपुर (हाम्रो खेलकुद)– भ्याली च्यासल युथ क्लब सिएमजी भरतपुर गोल्डकप फुटबल प्रतियोगिताको क्वाटरफाइनलमा प्रवेश गरेको छ । मेची नेत्रालय काकरभिट्टा गोल्डकपको विजेता नेपाल पुलिस क्लबलाई शुक्रबार २–१ ले हराउँदै च्यासल अन्तिम आठमा पुगेको हो ।
च्यासलका लागि पूर्णबहादुर गुरुङ र सुसन लामाले गोल गरे । पुलिसका लागि अनुप लिम्बुले गोल फर्काएका थिए । पूर्णले २७ औं मिनेटाम गोल गर्दै च्यासललाई अग्रता दिलाएका थिए । सुसनले ५७ औं मिनेटमा गोल थपे । पुलिसका अनुपले ६७ औं मिनेटमा गोल फर्काएका थिए ।
च्यासलका पूर्ण खेलको म्यान अफ दी म्याच घोषित भए र उनले १० हजार रुपैयाँ प्राप्त गरेका थिए । एजे इन्टरनेसनले आयोजना गरेको प्रतियोगितामा बिहीबार चितवन ११ र त्रिभुवन आर्मी क्लबबीच पहिलो क्वार्टरफाइनल हुनेछ । प्रतियोगिताको विजेताले ६ लाख रुपैयाँ प्राप्त गर्नेछन् ।
