काठमाडौं (हाम्रो खेलकुद)– वरिष्ठ उपाध्यक्ष चयनको विषयले अखिल नेपाल फुटबल संघ (एन्फा) को आज बस्न लागेको केन्द्रिय कार्यसमिति बैठकमा आज टुंगाउने सम्भावना देखिएको छ । एन्फा बैठक पार्क भिलेजमा बस्दैछ ।

कार्यसमिति निर्वाचित भएको १ वर्ष नाघिसक्दा पनि एन्फाले वरिष्ठ उपाध्यक्षको टुंगो लगाउन सकेको छैन । एन्फा कार्यसमितिको निर्वाचन गत वर्ष वैशाख २२ गते भएको थियो ।
वरिष्ठ उपाध्यक्षको विषयसहित लिग, कर्मचारी कार्यविधि पास र यो वर्षका कार्यक्रमका विषयमा आज हुने बैठकले टुंगो लगाउने एन्फा प्रवक्ता किरण राईले हाम्रो खेलकुदलाई जानकारी दिए ।
वरिष्ठ उपाध्यक्षको विषयले दोस्रो पटक प्रवेश पाउन लागेको हो । यसअघि माघ २ गतेको बैठकमा यो विषयले प्रवेश पाएपनि त्यति बेला टुंगो लाग्न सकेन ।
वरिष्ठ उपाध्यक्षका विषयमा यसपटक भने टुंगिने प्रवत्ता राईले दाबी गरे । विधानत वरिष्ठ उपाध्यक्ष एन्फा कार्यसमितिको दोस्रो वरियतामा हुन्छन् । वरिष्ठ उपाध्यक्ष केन्द्रिय समितिको सर्वसम्मति वा बहुमतका आधारमा चयन हुने प्रवक्ता राईले बताए । एन्फाका ४ उपाध्यक्षमध्येबाट एक वरिष्ठ उपाध्यक्ष चयन हुनेछन् । एन्फा उपाध्यक्षमा पंकज नेम्बाङ, कृष्ण थापा, वीरबहादुर खड्का र उपेन्द्रमान सिंह निर्वाचित भएका थिए । त्यसमध्ये नेम्बाङ र खड्काले वरिष्ठ उपाध्यक्षको लागि दाबी गरिहेका छन् ।
सुरुमा दाबी गरेपनि अर्का उपाध्यक्ष थापाले भने दाबी छाडेको श्रोतले बतायो । नेम्बाङले निर्वाचित उपाध्यक्ष मध्ये बढी मत ल्याएकोले आफु हुनु पर्ने दाबी गरेको बताइएको छ । त्यस्तै अर्को उपाध्यक्ष खड्काले भने आफु यसअघि नै उपाध्यक्ष भइसकेकोले वरिष्ठ पाउनुपर्ने दाबी गरेको श्रोतले बतायो ।

अध्यक्षको अनुपस्थितिमा वरिष्ठ उपाध्यक्षले कार्यभार सम्हाल्ने वैधानिक व्यवस्था छ । एन्फा अध्यक्ष कर्मा छिरिङ शेर्पाले विदेश यात्राका क्रममा सुरुमा चार उपाध्यक्ष मध्ये एकलाई कार्यवाहक दिने गरेका थिए । पछिल्ला केहि विदेश यात्रामा भने उनले कुनै पनि उपाध्यक्षलाई कार्यवहाक दिएका छैनन् ।
नेम्बाङ र खड्काको दाबी रहेको स्वीकार्दै राईले भने, ‘यो विषय सहमतिमा टुगाउने छौं । त्यस्तो हुन नसके कार्यसमितिले ध्वानी मतको आधारमा टुंगिन्छ ।’