एजेन्सी – असिस्ट किङको उपमा पाएका इंग्ल्यान्ड तथा जर्मन क्लब बोरुसिया डर्टमन्डका युवा प्ले मेकर जाडोन सान्चोलाई यो सिजन क्लबले नबेच्ने बताएको छ ।
युवा स्टार सान्चोलाई इंग्लिस क्लब म्यानचेस्टर युनाइटेडले १०० मिलियन पाउन्डसम्म खर्च गर्दै अनुबन्ध गर्ने प्रयास गरिरहँदा डर्टमन्डका प्रमुख कार्यकारी अधिकृत (सिइओ) ह्यान्स जोचिव वाट्जकेले सान्चो बिक्रीमा नरहेको बताएका हुन् ।
‘युवा स्टार सान्चोलाई अनुबन्ध गर्ने प्रयास गर्नु युनाइटडेको कदम नराम्रो होइन । हामीलाई यसमा कुनै समस्या छैन । तर, उनी यो सिजन पनि डर्टमन्डमै रहनेछन् ।’ विल्डसँगको कुराकानीका क्रममा ह्यान्सले भने, ‘१९ वर्षीय सान्चोले अबको १० वर्ष जर्मन लिग खेल्छन् भन्ने छैन । हामी हाम्रो सम्झौतामा स्पष्ट छौं । यति बुझौ यो सिजन सान्चो बिक्रीमा छैन ।’
१९ वर्षीय विङ्गर सान्चोले जर्मन बुन्डेसलिगाको यो सिजन १३ गोल गर्दै १९ असिस्ट गरेका थिए । उनकै उच्च प्रदर्शनमा लुइसेन फाभ्रीको डर्टमन्डले जर्मन बुन्डेसलिगामा बायर्नसँग यो सिजनको उपाधिका लागि लिगको अन्तिम खेलसम्म नै संघर्ष गर्नुपर्ने बाध्यता सिर्जना गराएको थियो ।
इंल्गिस क्लब म्यानचेस्टर सिटीको एकेडेमीको उत्पादन सान्चोले इंग्ल्यान्डको सिनियर टोलीमा समेत स्थान बनाइसकेका छन् । युवा प्रतिभा जाडोनलाई अनुबन्ध गर्न युनाइटेडसँगै स्पेनका दुई महारथी रियल म्याड्रिड र बार्सिलोनाले पनि प्रस्तावको तयारी गरिरहेको बुझिएको छ ।
