एजेन्सी – युरोपेली फुटबलको ट्रान्सफर विन्डो अन्त्यतिर पुग्दा लामो समयदेखि चर्चामा रहेको नेयमारको ट्रान्सफरले पनि अब टुंगो लिने देखिन्छ ।

फ्रान्सेली च्याम्पियन पेरिस सेन्ट जर्मेन (पीएसजी) ले बार्सिलोनासामु नेयमारलाई अनुबन्धन गर्नका लागि आफ्नो माग अगाडि सारेको छ । केहि दिन अघिमात्र बार्सिलोनाको प्रस्ताव अस्विकार गरेको पीएसजीले बार्सिलोनासँग दुई खेलाडी र १ सय मिलियन माग गरेको हो । पीएसजीले फरवार्ड ओस्मान डेम्बेले र डिफेन्डर नेल्सन सेमेडोलाई नेयमारको ट्रान्सफरमा संलग्न गराउन माग राखेको छ ।

बार्सिलोनाका प्रतिनिधि नेयमारबारे अन्तिम छलफलका लागि पेरिस पुगेका छन् । दुई क्लबबीच मंगलबार दिउँसो पेरिसमा अन्तिम बैठक बस्ने फ्रान्सेली संचारमाध्यमले जनाएका छन् । बार्सिलोनाको प्रयास सफल नभएमा रियल म्याड्रिडले पनि पीएसजीलाई आफ्नो प्रस्ताव अगाडी सार्नेछ । नेयमारले बार्सिलोनालाई प्राथमिकतामा राखेकाले पीएसजीले रियलअघि क्याटलान क्लबसँग छलफल गरेको हो ।

बार्सिलोनाले डेम्बेलेलाई प्रस्तावमा संलग्न गर्न तयार भएपनि सेमेडोबारे भने क्लब प्रतिनिधिहरु विभाजित रहेका छन् । सर्जी रोबर्टो र मौसा वाग मात्र उक्त पोजिसनमा रहेकाले पनि बार्सिलोनाले सेमेडोबारे गम्भीर रुपमा सोचेको छ ।