एजेन्सी – युरोपेली ट्रान्सफर विन्डोमा यसपटक नेयमार चर्चाको केन्द्रविन्दु बने । ट्रान्सफर विन्डो सुरु भएदेखि उनको स्थानान्तरणलाई लिएर सुरु भएको चर्चा अब केहि दिन बाँकी हुँदा पनि सेलाएको छैन ।

स्पेनिस क्लब रियल म्याड्रिड र क्याटलान क्लब बार्सिलोनाले औपचारिक रुपमा नै पेरिस सेन्ट जर्मेन (पीएसजी) सामु प्रस्ताव राख्दा दुवैलाई फ्रान्सेली क्लबले नकारेको अवस्था छ । बार्सिलोनाले नेयमारलाई क्लबमा आबद्ध गर्न अर्को प्रस्ताव तयारी पार्दै गर्दा नेयमारले पीएसजीसामु आफू बार्सिलोना मात्र जाने प्रष्ट पारेका छन् ।

स्पेनिस संचारमाध्यम मार्साका अनुसार सोमबार नेयमारले पीएसजीका निर्देशक लिओनार्डोलाई सम्पर्क गर्दै आफ्नो निर्णय सुनाएका हुन् । नेयमारले आफ्नो पूर्वक्लबमा नै फर्कन चाहेको निर्देशकसमक्ष प्रष्ट पारेका छन् । यसअघि नेयमार बार्सिलोनाबाट नै विश्व कीर्तिमानी रकममा पीएसजी आएका थिए । पीएसजीमा उनले मैदानभित्र र बाहिर निकै आलोचना खेपेपछि क्लब छाड्ने निर्णय गरेका हुन् ।

रियल म्याड्रिड र युभेन्ट्सले पनि नेयमारको अवस्थालाई नजिकबाट नियालिरहेको र बार्सिलोनाको प्रस्ताव सफल नभए आफ्नो प्रस्ताव अगाडि बढाउने लक्ष्य राखेका छन् । दुवै क्लबले आफ्नो रोजाइमा नरहेका फरवार्डलाई नेयमार भित्र्याउन प्रयोग गर्ने बुझिएको छ । रियलले ग्यारेथ बेल तथा युभेन्ट्सले पाउलो डिबालालाई फ्रान्स पठाएर नेयमारलाई क्लबमा आबद्ध गर्ने प्रस्ताव आगाडि सार्ने सम्भावना छ ।

यद्यपी बार्सिलोना र पीएसजीका प्रतिनिधि हाल पेरिसमा छन् । दुवै क्लब प्रतिनिधिबीच मंगलबार बैठक बस्ने बुझिएको छ । पीएसजीले नेयमारका लागि ओस्मान डेम्बेले र नेल्सन सेमेडोसँगै १ सय मिलियिन युरो माग गरिरहँदा बार्सिलोना भने सेमेडोलाई सकेसम्म क्लबमा नै राख्ने योजनामा छ । सेमेडो आफैंपनि क्लब छाड्ने पक्षमा नरहेको बुझिएको छ ।

युरोपेली ट्रान्सफर विन्डोको ६ दिन मात्र समय बाँकी रहँदा सबै पक्ष उचित निर्णयको पर्खाइमा छन् । पीएसजीमा पनि चोटका कारण एडिन्सन काभानी र किलीयन एमबाप्पे घाइते भएपछि नेयमारबारे निर्णयको पर्खाइ रहेको छ । प्रशिक्षक थोमस टुचेलले नेयमारबारे यकिन निर्णय भएपछि मात्र उनलाई खेलाउने बताएका छन् ।