एजेन्सी – खेल जीवन जोगाउनका लागि पनि अलेक्स सान्चेजले म्यानचेस्टर युनाइटेड छोड्नु परेको प्रशिक्षक ओले गुनार सोल्सिजरले बताएका छन् । एक सिजनका लागि सान्चेज युनाइटेडबाट बिहीबार इन्टर मिलानमा आबद्ध भएका छन् ।

१८ महिना अघि आर्सनलबाट युनाइटेड पुगेका सान्चेज त्यहाँ प्रभाव जमाउन असफल भएका थिए । आर्सनल छाडेपछि उनले जम्मा तीन गोलमात्र गरेका थिए । जसका कारण उनी पहिलो रोजाईमा पर्न सकेनन् ।

‘उनी जान आवश्यक थियो । यहाँ उनका लागि सोचे जस्तो रहेन । नियमित टोलीमा पर्न गोल गर्नका लागि उनले फेरि सुरुवात गर्न जरुरी छ,’ उनले भने,‘ त्यसले सबैलाई फाइदा पुग्नेछ । हामीले उनलाई हरेक साता रोमेलु लुकाकुसँग खेलेको देख्न पाउनेछौं । मलाई आशा छ उनी त्यहाँबाट उत्कृष्ट भएर फर्कनेछन् । उनले युनाइटेडको पहिलो रोजाईको फरवार्ड तय गरिसकेको पनि उनले प्रष्ट पारे । उनले थपे,‘ एन्टोनी मार्सियल, मार्कुस रासफोर्ड र मासन ग्रिनउड नै हाम्रो सेन्टर फरवार्ड हुन् ।’

सिजनका सुरुवाती तीन खेलमा १७ वर्षे ग्रिनउडले वैकल्पिक रुपमा मैदान प्रवेश गर्दै आएका छन् । ‘ग्रिनउड नियमित खेल्ने अवस्थामा अलिक छैनन्,’ उनले भने,‘ उनी आधा एक घन्टा खेल्नेछन् । उनी सिक्ने क्रममा छन् । उनले मार्सियल र रासफोर्डलाई साथ दिनेछन् ।’