काठमाडौं (हाम्रो खेलकुद) – किर्गिस्तानमा आयोजना हुने नादेझ्दा कपमा भाग लिन नेपाली महिला राष्ट्रिय फुटबल टोली आज त्यसतर्फ प्रस्थान गरेको छ । नादेझ्दा कपमा सहभागी चार देशका टोलीले ५ दिनमा ४ खेल खेल्नु पर्नेछ ।

नेपालले नादेझ्दा कपमा लगातार तीन दिन समूह चरणका खेल खेल्दैछ । भदौ २२ गते आयोजक किर्गिस्तानसँगै खेल्दै नेपालले प्रतियोगिताको सुरुवात गर्नेछ । भदौ २३ गते उज्वेकिस्तानसँग खेलेपछि नेपालले त्यसको भोली पल्ट भदौ २४ गते ताजिकिस्तानको सामना गर्नेछ । राउन्ड रोविन लिग पछि भदौ २६ गते शीर्ष २ टोलीले उपाधिका लागि र त्यसपछिका दुई टोलीले तेस्रो स्थानका लागि प्रतिस्पर्धा गर्नेछन् ।

मंसिरमा स्वदेशमा आयोजना हुने १३ औं दक्षिण एसियाली खेलकुद (साग) को तयारीका रुपमा यो प्रतियोगितालाई हेरिएको छ । महिला टोलीले गत वर्ष उच्च प्रदर्शन गरेको थियो । चैतमा विराटनगरमा साफ च्याम्पियनसिपको फाइनल खेल्नुअघि नेपाली टोलीले सन् २०२० ओलम्पिक छनोटको पहिलो चरण पार गरेको थियो ।

त्यस्तै टोलीले भारतमा आयोजना भएको हिरो गोल्ड कपको फाइनल खेलेको थियो । त्यहि प्रतियोगितामा नेपालले भारतलाई पहिलो पटक महिला फुटबलमा पराजित गरेको थियो । त्यसअघि वा पछि नेपालले भारतलाई हराउन सकेको थिएन ।

नेपाल महिला फुटबल टोली

१.एन्जिला तुम्बापो सुब्बा
२.अन्जना राना मगर
३.पुनम जर्घामगर
४.हिरा कुमार भुजेल
५. अमृता जैशी
६.दिपा राई
७.रेनुका नगरकोटे
८.अनिता बस्नेत
९.मन्जली कुमारी योञ्जन
१०.सरु लिम्बु
११.सावित्रा भण्डारी
१२.निरु थापा
१३.रेखा पौडेल
१४.अनिता केसी
१५.गिता राना
१६.कबिता धिमाल
१७.विमला चौधरी
१८.इन्दिरा राई

अफिसियल:

प्रशिक्षक – हरि खड्का
सहायक प्रशिक्षक – अरुणा गुरुङ
गोलरक्षक प्रशिक्षक – अस्मिता खवास
फिजियोथेरापीस्ट – नविना श्रेष्ठ
टिम डाक्टर – राजु डंगोल महर्जन
व्यवस्थापक – पेमा लामा