काठमाडौं (हाम्रो खेलकुद) – पहिलोपटक फिफा विश्वकपमा सिधै दोस्रो चरणको खेल खेल्ने मौका पाएको नेपालले बिहीबार कुवेतविरुद्ध खेल्दै विश्वकप छनोटको प्रारम्भ गर्दैछ ।

खेल नेपाली समयअुनसार जविर अल अहमेद इन्टरनेसनल मैदानमा आज राति १०ः४५ बजेपछि सुरु हुनेछ । घरेलु टोली कुवेतलाई स्तब्ध पार्दै नेपाल विश्वकप छनोटको दोस्रो चरणलाई सुखद सुरुवात गर्ने लक्ष्यमा मैदान उत्रनेछ । युवा जोशले भरिएको नेपाली टोलीको लागि शारीरिक र मानसिक रुपमा बलियो कुवेतविरुद्ध असहज पक्कै हुनेछ । तर, नेपाल कुवेतविरुद्ध अंक खोस्ने लक्ष्यमा नै मैदान उत्रनेछ ।

नेपाल र कुवेत हालसम्म ६ पटक आमने समाने भएका छन् । ‘हेड टु हेड’ मा नेपाल कुवेतसँग निकै पछि छ । चैत पहिलो साता भएको मैत्रीपुर्ण खेलमा कुवेतलाई गोलरहित बराबरीमा रोक्न सक्नु नै नेपालको अहिलेसम्मको बहादुरी प्रदर्शन हो । ६ भेटमा नेपालले २२ गोल खादा १ गोल मात्रै फर्काएको छ । त्यो एक गोल १९८२ को एसियन गेम्समा रहेको थियो ।

कुवेतसँगको लगातार हारको श्रृंखला नेपालले यसैवर्ष तोडेको थियो । मार्चमा खेलिएको पहिलो मैत्रीपूर्ण खेलमा नेपालले कुवेतलाई गोलरहित बराबरीमा रोकेको थियो ।

‘हेड टु हेड’ मा कुवेत र नेपाल १९८२ एसियन गेम्स (३–१)  १९८६ एसियन गेम्स (५–०) १९९४ एसियन गेम्स (८–०) २००० एसियन गेम्स (५–०) २०१९ मार्च मैत्रीपुर्ण (०–०) २०१९ मार्च मैत्रीपुर्ण (१–०)