काठमाडौं (हाम्रो खेलकुद)– राष्ट्रिय फुटबल टोलीको विश्व कप छनोटको यात्रा आज सुरु हुँदैछ । नेपालले राती १०:४५ बजे सुरु हुने खेलमा कुवेतको सामना गर्दैछ । पछिल्लो तीन वर्ष देखि नेपाली टोलीलाई नियमित कप्तानी गर्दै आएका विराज महर्जन यसपटक टोलीमा छैनन् । यद्दपी उनले टोलीलाई सामाजिक सञ्जालमार्फत शुभकामना दिएका छन् ।

नेपालका लागि सर्वाधिक अन्तर्राष्ट्रिय खेल खेलेका विराजले फुसबुकमा लेखेका छन्,‘ म अहिले टोलीमा छैन । तर पनि मेरो मन तिमिहरु सँगै छ । साथी एवंम् दाजुभाईहरु आजको खेलका लागि शुभकामना । कडा मेहनत गर र डटेर खेल । ’

भदौको ९ गते मलेसियाको लिग च्याम्पियनसिपविरुद्धको खेलमा प्रशिक्षक योहान कालिनकै सल्लाहमा टोली बाहिर रहेका विराज त्यसपछि विश्व कप छनोट टोलीमा भने अटाएनन् । तथापी उनले हिम्मत हारेका छैनन् ।

उनले फेसबुमा लेखेका छन् । ‘जीवन कठिन छ । कहिलेकाहीं फुटबल पनि कठिन हुनु गर्दछ । तर मलाई एउटा कुरा थाहा छ, म कहिले पनि हार मान्दिन,’ उनले भावना पोखेका छन्,‘ मेरो जीवनमा यस्तो बारम्बार हुनेगर्दछ । म लक्ष्यका साथ अघि बढिरहेको छु र अन्त्यसम्म संघर्ष गर्छु । माया र साथका लागि समर्थकहरु सबैलाई धन्यवाद । म जित वा हारलाई कहिल्यै लुकाउने छैन ।’

सोझै विश्वकप छनोटको दोस्रो चरण खेल्न लागेको नेपाल रहेको समूहमा कुवेतसँगै अस्ट्रेलिया, जोर्डन र चाइनिज ताइपेइ छन् । नेपालले भदौ २४ गते चाइनिज ताइपेइसँग खेल्नेछ । टोलीमा फर्कनका लागि विराजले आफु हरसम्भव प्रयासरत रहने हाम्रो खेलकुदसँग बताएका थिए ।