सुबास हुमागाईं, काठमाडौं

नेपाली राष्ट्रिय फुटबल टोलीले कतार २०२२ विश्वकप छनोटको दोस्रो चरण अन्तर्गत पहिलो खेलमा कुवेतको सामना गर्दैछ । नेपाली समयअनुसार रातको १०:४५ बजे हुने उक्त खेलमा नेपालको सुरुवाती ११ कस्तो हुन्छ भन्ने कौतुहलताको विषय बनेको छ ।

प्रशिक्षक योहान कालिनलाई २३ खेलाडी सम्मिलित अन्तिम टोलीको छनोट गर्न नै निकै कठिन रहेको टोलीमा बढ्दो अन्तरिक प्रतिस्पर्धाले प्रष्ट पार्दछ । नियमित कप्तान विराज महर्जन हाल कुवेत पुगेको टोलीमा छैनन् । गोलरक्षकको भूमिकामा किरण चेम्जोङ स्पष्ट रुपमा सुरुवाती ११ मा पर्नेछन् । उनले नै टोलीको कप्तानी गर्ने बलियो सम्भावना रहेको छ ।

डिफेन्समा लेफ्ट ब्याकको भूमिकामा सुमन अर्यालको सम्भावना बलियो छ । मध्यभागमा अनन्त तामाङ र देवेन्द्र तामाङको जोडीले नै निरन्तरता दिनेछन् । राइट ब्याकमा भने तीन खेलाडीको दावेदारी रहनेछ । अजित भण्डारी, सरोज दाहाल र दिनेश राजवंशीका रुपमा विराज महर्जनको अनुपस्थितिमा कडा प्रतिस्पर्धा रहेको छ । यद्यपि प्रशिक्षक कालिनले अजितलाई पछिल्लो समय प्राथमिकतामा राखेका छन् ।

अवे खेल भएकाले नेपालको रणनीति रक्षात्मक हुने सम्भावना छ । प्रशिक्षक कालिनले रोहित चन्दसँगै विक्रम लामालाई मध्यभागमा उतार्न सक्छन् । विक्रम र रोहित रक्षात्मक खेलका लागि मध्यभागमा निपुण छन् । शारीरिक रुपमा पनि कुवेती खेलाडीलाई टक्कर दिन यी दुईको उपस्थितिले नेपालको डिफेन्सलाई सहज हुनेछ । रोहित र विक्रमलाई विशाल राईले सहयोग गर्नेछन् । चलायमान मिडफिल्डर विशाल ९० मिनेट नै विपक्षी खेलाडीसँग जुझ्ने क्षमता राख्दछन् । केहि आक्रामक रणनीति आवश्यक परेमा क्रिएटिभ मिडफिल्डका रुपमा वैकल्पिक खेलाडी सन्तोष तामाङ र हेमन गुरुङ आउने छन् ।

आक्रमणमा विमल घर्तीमगरलाई दुई विंगरको साथ रहनेछ । त्यसका लागि रवी पासवान राइट र सुजल श्रेष्ठ लेफ्ट विङ्गमा बलियो दावेदारी प्रस्तुत गर्दैछन् । रवी द्रुत गतिमा बल अगाडी बढाउन सक्छन् जुन कुवेतका लागि काउन्टर अट्याकमा घातक बन्न सक्छ । सुजल मिडफिल्डमा झरेर खेल्न सक्ने हुनाले नेपाललाई सन्तुलन बनाउन सहज हुनेछ । नवयुग श्रेष्ठ शत प्रतिशत फित नहुनुले पनि विमलमाथि थप जिम्मेवारी छ । त्यसो त अभिषेक रिजाल, अन्जन विष्ट र सुनिल बलका रुपमा वैकल्पिक खेलाडी कुनै समय खेलको नतिजा बदल्न सक्ने क्षमता राख्दछन् ।

सम्भावित सुरुवाती ११ : (४-३-३)

किरण चेम्जोङ
अजित भण्डारी – अनन्त तामाङ – देवेन्द्र तामाङ – सुमन अर्याल
विक्रम लामा
रोहित चन्द – विशाल राई
रवी पासवान – विमल घर्तीमगर – सुजल श्रेष्ठ