एजेन्सी – कप्तान ह्यारी केनको ह्याट्रिक मद्दतमा इंग्ल्यान्डले युरोकप छनोटमा शतप्रतिशत जित निकालेको छ । शनिबार राति भएको खेलमा इंग्ल्यान्डले बुल्गेरियालाई ४–० को फराकिलो अन्तरले पराजित गरेको हो ।

वेम्वली स्टेडियममा भएको खेलमा इंग्ल्यान्डले खेलको २४औं मिनेटमा कप्तान केनको गोलबाट खेलमा अग्रता लिएको थियो । उनले रहिम स्ट्रलिङको पासमा गोल गरेका थिए । पहिलो हाफमा १–० को अग्रता लिएको इंग्ल्यान्डले दोस्रो हाफमा थप ३ गोल गर्न सफल भएको थियो ।

५०औं मिनेटमा केनले पेनाल्टीमा गोल गर्दै इंग्ल्यान्डको अग्रता दोब्बर पारे । गोलरक्षक जोर्ड पिकफोर्डको लामो पासमा रासफोर्डलाई निकोले बोडोरोभले पेनाल्टी बक्समा लडाएपछि प्राप्त पेनाल्टीमा केन चुकेनन् ।

५५औं मिनेटमा केनकै पासमा रहिमले गोल गरेपछि इंग्ल्यान्डले ३–० को अग्रता लियो । ७३औं मिनेटमा केनले पुनः पेनाल्टीका गोल गर्दै ह्याट्रिक पुरा गर्दा इंग्ल्यान्ड खेलमा ४–० ले अघि बढ्यो । क्रिस्टियन डिमित्रोभले केनलाई बक्समा लडाएपछि रेफ्रीले इंग्याल्डलाई पेनाल्टी प्रदान गरेको थिए । जसमा केन चुकेनन् । त्यसपछि थप गोल निस्कन नसक्दा इंग्ल्यान्ड ४–० ले विजयी हुन सफल भयो ।

जितसँगै समूह ‘ए’ मा अपराजित रहेको इंग्ल्यान्डले ३ खेलबाट ९ अंक जोडेको छ । बुल्गेरिया २ अंक जोडेर पुछारमा छ । यही समूको अर्काे खेलमा कोसोभाले चेक रिपब्लिकलाई २–१ ले पराजित गरेको छ । कोसोभो ८ अंक जोडेर दोस्रो तथा चेकको ६ अंक छ । मोन्टेनेग्रोको २ अंक छ ।