एजेन्सी – स्टार फरवार्ड क्रिस्टियानो रोनाल्डोको गोलसँगै पोर्चुगलले युरोकप छनोटमा पहिलो जित निकालेको छ । शनिबार राति भएको खेलमा पोर्चुगलले सर्वियालाई उसकै मैदानमा ४–२ ले पराजित गर्दै युरो छनोटमा पहिलो जित निकालेको हो ।

यसअघि पोर्चुगलले शुरुवाती दुई खेलमा बराबरीको नतिजा निकालेको थियो । राजको मिटिक वियोग्राडमा विलियम कार्भाल्होले गोल गर्दै पोर्चुगललाई पहिलो हाफमा १–० को अग्रत दिलाएको थिए । ५८औं मिनेटमा गोन्कालो गुइडेजले गोल गर्दै पोर्चुगलको अग्रता दोब्बर बनाए । उनले ब्रुनो फनान्डेजको पासमा गोल गरेका थिए ।

६८औं मिनेटमा निकोला मिलेन्कोभिकले गोल गर्दै घरेलु टोलीलाई खेलमा फर्काउने संकेत दिएका थिए । तर, ८०औं मिनेटमा रोनाल्डोले बर्नाडो सिल्भाको पासमा गोल गर्दै पोर्चुगललाई ३–१ ले अघि बढाए ।

८५औं मिनेटमा एलेकसन्डर मिट्रोभिकले गोल गर्दै सर्वियालाई ३–२ को अवस्थमा ल्याए । त्यसको १ मिनेट पछि नै बर्नाडो सिल्भाले राफयल गुरेरोको पासमा गोल गर्दै पोर्चुगललाई ४–२ को जित दिलाए ।

जितसँगै पोर्चुगलले समूह ‘बी’ मा ३ खेलबाट ५ अंक जोड्दै दोस्रो स्थानमा उक्लिएको छ । सर्विया ४ अंक जोडेर चौथो स्थानमा छ ।
यही समूहको अर्काे खेलमा शीर्षस्थानमा रहेको युक्रेनले लिथुनियालाई ३–० ले पराजित गरेको छ । जितसँगै ५ खेलबाट १३ अंक जोडेको छ । लिथुनिया १ अंकसहति पुछारमा छ ।