काठमाडौं (हाम्रो खेलकुद) – नेपाली राष्ट्रिय फुटबल टोलीले कतार २०२२ विश्वकपको दोस्रो चरण छनोट अन्तर्गत समूहको दोस्रो खेलमा चाइनिज ताइपेइको सामना गर्दैछ । खेलका लागि नेपाली टोली आइतबार विहान ताइपेइ पुगेको थियो ।

खेलको पूर्वसन्ध्यामा आयोजित पत्रकार सम्मेलनमा बोल्दै नेपाली टोलीका कार्यवाहक कप्तान किरण चेम्जोङ र प्रशिक्षक योहान कालिनले नेपाल खेलका लागि तयार रहेको बताए । ‘ हामीले ताइपेइ आएर आइतबार नै हल्का प्रशिक्षण गर्यौं । हाम्रो तयारी यहाँ आउनुअघि नै भएको थियो । कुवेतविरुद्ध खेलपछि नै यस खेलबारे हामीले सोच्न थालेका छौं । अब आज अन्तिम प्रशिक्षण हुनेछ । हामी खेलका लागि तयार छौं,’ कप्तान तथा गोलरक्षक किरणले भने ।

प्रशिक्षक कालिनले लामो यात्राका बाबजुद पनि टोलि अब खेलका लागि तयार रहनुपर्ने बताए । ‘हामीले कुवेतविरुद्ध खेलेपछि नेपालमै लामो ट्रान्जिट रहयो । अहिले पनि हङकङ हुँदै यहाँसम्मको यात्रा तय गर्यौं । हिजो हल्का प्रशिक्षणका रुपमा हामीले खेलाडीलाई फ्रेस बनाउन मात्र मैदान पुग्यौं । पर्याप्त विश्राम लिएको आशा गरेको छु,’ कालिनले भने ।

कालिनका अनुसार कुवेतविरुद्ध खेलमा फराकिलो हार आश्चर्यजनक नतिजा थियो । ‘ हामीले खेलको सुरुवाती समयमा नै गोल खायौं । दोस्रो हाफमा सम्हालिन नसक्दा फराकिलो हार बेहोर्नुपर्यो । डिफेन्समा साना गल्ति नै हामीले महँगो मूल्य चुकाउनु पर्यो । अब ताइपेइविरुद्ध ती गल्ति सच्याउनु जरुरि छ,’ उनले थपे ।

कालिनले पछिल्लो पटक ताइपेइसँग १-१ को बराबरी खेलेपनि अब नयाँ खेलमा नयाँ सुरुवात रहने बताए । ‘ हामीले पुरानो नतिजा हेरेर हुन्न । उक्त खेल मैत्रीपूर्ण थियो भने यो प्रतिस्पर्धात्मक खेल हो । नतिजा निकै महत्त्वपूर्ण हुने कारण पनि दुवै टोलीको रणनीति फरक हुन सक्छ,’ उनले प्रष्ट पारे ।

नेपाल र ताइपेइबीचको खेल मंगलबार नेपाली समयअनुसार साँझ ५ बजे सुरु हुनेछ । समूहको पहिलो चरणको खेलमा नेपाल कुवेतसँग ७-० ले पराजित हुँदा जोर्डनले ताइपेइको मैदानमा २-१ को जित दर्ता गरेको थियो । मंगलबार दोस्रो खेलमा अष्ट्रेलियाले कुवेतको मैदानमा प्रतिस्पर्धा गर्नेछ ।