एजेन्सी – इटालियन सिरी ए अन्तर्गत मंगलबारको खेलमा ब्रेसियालाई पराजित गर्दै इन्टर मिलान अंक तालिकाको शीर्षस्थानमा उक्लिएको छ । ब्रेसियाको मैदानमा इन्टरले २-१ को जित दर्ता गरेको हो ।

इन्टरका लागि खेलको २३ औं मिनेटमा अर्जेन्टिनी फरवार्ड लौटारो मार्टिनेजले गोल गर्दै अग्रता दिलाएका थिए । उनको प्रहार विपक्षी खेलाडीलाई लाग्दै गोलमा परिणत भएको थियो । दोस्रो हाफको ६३ औं मिनेटमा उत्कृष्ट लयमा रहेका फरवार्ड रोमेलु लुकाकुले इन्टरको अग्रता दोब्बर पारे । यसै सिजन म्यानचेस्टर युनाइटेडबाट आएका लुकाकुले दायाँ विङबाट बललाई पोस्टतर्फ ल्याउँदै २५ यार्ड टाढाबाट गोल गरेका थिए । उनले यस सिजन १० खेलमा ७ गोल गरिसकेका छन् ।

खेलको ७६ औं मिनेटमा ब्रेसियाले गोल गर्दै खेलमा फर्कने लक्षण देखायो । इन्टरका डिफेन्डर मिलान स्क्रिनियरले आत्मघाती गोल गरेपनि इन्टरले त्यसपछि सम्हालिएको प्रदर्शन गर्यो । यसै सिजन टोलीको जिम्मेवारी सम्हालेका प्रशिक्षक एन्टोनियो कोन्टेले टोलीसँग रहेर राम्रो प्रदर्शन गरिरहेका छन् ।

यस जितसँगै इन्टर अंक तालिकाको शीर्षस्थानमा उक्लिएको छ । इन्टरले १० खेलमा ८ जित, १ बराबरी र १ हारसँगै २५ अंक जोडेको छ । साविक विजेता युभेन्टस ९ खेलमा २३ अंकसहित दोस्रो स्थानमा छ । जारि सिजन अपराजित रहेको युभेन्ट्सले बुधबार जेनोआको सामना गर्दैछ ।