एजेन्सी – साविक विजेता म्यानचेस्टर सिटीले काराबाओ कपको क्वार्टरफाइनलमा लिग वान टोली अक्सफोर्ड युनाइटेडको सामना गर्नुपर्ने भएको छ । त्यस्तै लिग टुको कोलचेस्टर युनाइटेडले पाँच पटकको विजेता म्यानचेस्टर युनाइटेडलाई प्रतिद्वन्द्विका रुपमा पाएको छ ।

एस्टन भिल्लाले आठ पटकको विजेता लिभरपुलको आतिथ्यता गर्नेछ । त्यस्तै अर्को क्वार्टरफाइनल खेल एभर्टन र लेस्टर सिटीबीच प्रतिस्पर्धा हुनेछ । क्वार्टरफाइनल खेल डिसेम्बर १६ का लागि तय भएको छ । तर, त्यो मिति भने लिभरपुलका लागि भने अनकुल नहुने भएको छ । लिभरपुलले डिसेम्बर १८ मा फिफा क्लब विश्व कप खेल्नुपर्नेछ ।

इएफएलले लिभरपुलसँग छलफल गर्नेछ र विकल्प खोजिनेछ । फिफा क्लब विश्व कपको तयारीलाई ध्यानमा राखिने इएफएलका प्रवक्ताले जनाएका छन् । लिभपुरलले आर्सनललाई ५–५ को बराबरीपछि पेनाल्टीमा ५–४ ले हराउँदै अन्तिम आठको यात्रा तय गरेको थियो । यद्यपी लिभरपुलले भने उचित मिति नआएको खण्डमा क्लबले प्रतियोगिताको खेल नै नखेल्ने सम्भावना समेत रहेको बताए । ‘यदि हामीलाई अनुकुल समय भएन भने हामी खेल्न सक्दैनौ । त्यस्तोमा हाम्रो प्रतिद्वन्द्विले सिधै अर्को चरण प्रवेश पाउनेछ वा आर्सनलले क्वार्टरफाइनल खेल्नेछ’, बुधबारको खेलपछि लिभरपुलका प्रशिक्षक योर्गन क्लोपले भनेका थिए ।

क्वार्टरफाइनल खेलहरु:

अक्सफोर्ड युनाइेटविरुद्ध म्यानचेस्टर सिटी

म्यानचेस्टर युनाइटेडविरुद्ध कोलचेस्टर युनाइटेड

एस्टन भिल्लाविरुद्ध लिभरपुल

एभर्टनविरुद्ध लेस्टर सिटी