काठमाडौं (हाम्रो खेलकुद)– अखिल नेपाल फुटबल संघ (एन्फा) ले नयाँ प्रतियोगिताका रुपमा यसै महिना सोलिडारिटी फुटबल प्रतियोगिता आयोजना गर्ने भएको छ । फुटबल विकासका लागि सहकार्यको दायरालाई फराकिलो पार्ने उद्देश्यका साथ प्रतियोगिता आयोजना गर्न लागिएको एन्फाका महासचिव इन्द्रमान तुलाधारले बताएका छन् ।

अर्को महिना हुने सहिद स्मारक ए डिभिजन लिग फुटबलमा बढी भन्दा बढी सरोकारवालाहरुको सहकार्य रहोस् भन्ने उद्देश्यका साथ वामवर्पका रुपमा सोलिडारिटी फुटबल आयोजना गर्न लागिएको महासचिव तुलाधरले बताए ।

एन्फा कम्प्लेक्स सातदोबाटोमा कात्तिक २९ गतेबाट प्रतियोगिता ४ दिन सम्म चल्ने बताइएको छ । प्रतियोगितामा बढी भन्दा बढी टोलीको सहभागिता रहोस् भन्ने एन्फाको चाहना रहेको तुलाधरले सुनाए ।

प्रतियोगितामा औद्योगिक प्रतिष्ठान, बैंकर्स, दुतवास र गैर सरकारी संस्थाको सहभागिता रहने एन्फाले जनाएको छ । यस्ता प्रतिष्ठानहरुसँगको सहकार्यले लिग फुटबल अझै बढी प्रभावकारी हुने विश्वास संघले लिएको जनाइएको छ ।

‘अर्को महिना लिग फुटबल आयोजना गर्दैछौं । त्यसलाई मध्यनजर गर्दै फुटबल विकासमा सहयात्रीहरुको बढाउन सकिन्छ भन्ने उद्देश्यले प्रतियोगिताको आयोजना गरेका हौं,’ महासचिव तुलाधरले भने,‘ सबैको सहयोग विना फुटबल विकास सम्भव छैन ।’ एन्फाले ए डिभिजन लिग मंसिर २८ गते सुरु गर्ने यसअघि नै सार्वजनिक गरिसकेको छ । प्रतियोगिताको लागि एन्फाले आइडिया सपसँग रणनीतिक साझेदारी गरेको जनाएको छ ।