एजेन्सी – अन्तिम समयमा सम्हालिन नसक्दा टोटेनहम इंग्लिस प्रिमियर लिगमा एभर्टनसँग बराबरीमा रोकिएको छ । १० खेलाडीमा समेटिएको टोटेनहम एभर्टनसँग १–१ गोलको बराबरीमा रोकिएको हो ।

गुडिसन पार्कमा आइतबार राति भएको निकै प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । ६३औं मिनेटमा डेल अलीको गोलबाट टोटेनहम खेलमा अघि बढेको थियो । उनले ह्युङ मिन सनको पासलाई सदुपयोग गरेका थिए । पहिलो हाफमा दुवै टोलीले अपेक्षित प्रदर्शन गर्न सकेका थिएनन् ।

७९औं मिनेटमा टोटेनहम १० खेलाडीमा समेटियो । आन्द्र गोमेजमाथि फल गरेपछि रेफ्रीले सनलाई सिधै रातो कार्ड देखाउदै मैदान बाहिर पठाएका थिए । उक्त ट्याकलपछि गोमेस सर्ज औरियरसँग जुध्न पुग्दा गोमेसको खुट्टामा गम्भीर चोट लागेको थियो । गोमेसको चोटपछि दुवै टोलीका सदस्य केहि अत्तालिएका थिए । गम्भीर चोट लागेपछि गोमेसको उपचारमा केहि समय लागेको थियो ।

रेफ्रीले इन्ज्युरी समयका रुपमा १२ मिनेट समय थपेका थिए । उक्त समयको आठौं मिनेटमा एभर्टनले खेलमा बराबरी गर्न सफल भयो । एभर्टनका सेन्क टोसुमले लुकास डिग्नेको पासमा गोल गर्दै सम्भावित हार टारे । बराबरीसँगै टोटेनहम ११ खेलबाट १३ अंक जोडेर ११औं स्थानमा छ । एभर्टन ११ अंकसहित १७औं स्थानमा छ ।