पेरिस (एजेन्सी)– युरो २०१६ अन्तर्गत क्रोएसिया र चेक रिपब्लिक बिचको खेल २-२को बराबरीमा सकिएको छ।
एक समय २-०को अग्रता लिएर खेलमा दह्रो पकड जमाइरहेको क्रोएसियाले अन्तिम समयमा लय गुमाउन पुगेको थियो। क्रोएसियाका लागि पहिलो गोल इभान पेरिसिचले ३७औं मिनेटमा गरेका थिए भने बार्सिलोनाका इभान राकिटिचले दोश्रो हाफमा गोल गर्दै क्रोएसियालाई २-०को अग्रता दिलाएका थिए। उनले खेलको ५७औं मिनेटमा ब्रोजोभिचको पासको सदुपयोग गर्दै गोल गरेका थिए।
तर स्कोडाले ७६औं मिनेटमा चेक गणतन्त्रका लागि गोल गर्दै खेलमा फर्कने संकेत दिए। खेलको अन्तिमसमयमा क्रोएसियाका समर्थकहरुले मैदानमा आगो र पटाका फालेपछि केहि समय खेल रोकिएको थियो। अन्तिम समयमा भिडाले बल हातले छोएपछि चेकले पेनाल्टि पाएको थियो। नेसिडले ९०औं मिनेटमा सो पेनाल्टिमार्फत गोल गर्दै खेल बराबरीमा ल्याए।
समूह डीमा अहिले १२ः४५ मा स्पेन र टर्कीबीच प्रतिस्पर्धा हुँदैछ । लगातार दुई खेल जित्नै क्वार्टरफाइनल पुग्ने सम्भावनाबाट क्रोएसिया केही दिन कुर्नु पर्ने अवस्थामा पुगेको छ । क्रोएसियाका ४ अंक पुगेको छ भने स्पेनको ३, चेक गणतन्त्रको १ र टर्की अंक बिहिन ।
