काठमाडौं (हाम्रो खेलकुद)– नेपाल र कुवेतबीच मंसिर ३ गतेको विश्व कप छनोटको खेल अन्ततः भुटानमा हुने तय भएको छ । दशरथ रंगशालाको पुर्न निर्माण सम्पन्न भइनसकेको कारण एसियाली फुटबल महासंघ (एएफसी) ले नेपाल र कुवेतको खेल त्यहाँ हुन नसक्ने निर्णय गरेको थियो ।

नेपालले न्यूट्रल भेन्यूका रुपमा भुटानका चाङलिमिथाङ रंगशाला प्रस्ताव गरेको थियो । तर कुवेतले त्यहाँ पनि खेल्न अस्वीकार गर्दै आएको थियो । यसबीचमा एएफसी र फिफाले नेपालले प्रस्ताव गरे अनुसार नेपालको प्रस्ताव अनुसार नै भुटानमा खेल गराउन स्विकृति दिएको अखिल नेपाल फुटबल संघ (एन्फा) ले सोमबार प्रेस विज्ञप्तीमार्फत जानकारी दिएको छ ।

नेपालले भदौमा कुवेतविरुद्ध अवे खेल खेल्दै विश्व कप छनोटको सुरुवात गरेको थियो । जसमा नेपाल ७–० को लज्जास्पद अन्तरमा पराजित भएको थियो । त्यसको ५ दिन पछि चाइनिज ताइपेलाई २–० ले हराएको नेपालका लागि दुवै गोल अन्जन विष्टले गरेका थिए । गत महिना भएका दुवै खेलमा नेपालले लगातार हार बेहोरेको थियो । अष्ट्रेलियासँग ५–० को हार र त्यसको ५ दिन पछि जोर्डनसँग ३–० को हार बेहोर्दै नेपाल टोली स्वदेश फर्केको थियो ।

अबका बाँकी सबै ४ खेल नेपालले नेपालमा खेल्नु पर्ने थियो । तर दशरथ रंगशालाको भिआइपी प्यारापिटको छाना हाल्ने र सिटको काम अझै नसकिएपछि एएफसीले स्थलगत निरिक्षणपछि त्यहाँ खेल गराउन अस्वीकार गरेको थियो । त्यसअघि नै कुवेतले दशरथ रंगशालाको निरिक्षण गरि त्यहाँ खेल्न नसक्ने एएफसीलाई जनाएको थियो ।

विकल्पका रुपमा नेपालले भुटान प्रस्ताव गर्दा कुवेतले त्यहाँ पनि नखेल्ने बताएको थियो । केहि दिन अघि कुवेतका फुटबल पदाधिकारीले एएफसीका अध्यक्ष शेख सलमानलाई भेटी भुटानमा खेल्न नसक्ने र अन्यत्र कतै खेल गराउन लविङ गरेको थियो । तर, एएसफीले नेपालको प्रस्तावलाई स्वीकार गर्दै शंकाको अन्त्य गरेको छ ।