एजेन्सी – इंग्लिस क्लब टोटेनहम हस्टपरले आफ्ना मुख्य प्रशिक्षक माउरिसियो पोचेटिनोलाई बर्खास्त गरेको छ । यो सिजन घरेलु प्रतियोगितामा लगातार खराब प्रदर्शनसँगै क्लबले पोचेटिनोलाई मंगलबार राति बर्खास्त गरेको हो । 

विज्ञप्ति जारी गर्दै बोर्डको गम्भीर छलफलपछि यो निर्णय लिएको क्लबका अध्यक्ष डेनियल लेभीले बताएका छन् । प्रिमियर लिगको १२औं चरण सकिँदा टोटेनहम १४ अंकसहित १४औं स्थानमा छ । उसले तीन जित, पाँच बराबरी र चार हारको नतिजा निकालेको छ । यस्तै पोचेटिनोको प्रशिक्षणमा टोटेनहमले गत जनवरीदेखि अवे मैदानमा जित निकाल्न सकेको छैन ।

सन् २०१४ को मेमा साउथह्याम्पटनबाट टोटेनहममा आबद्ध भएपछि पोचेटिनोले गत सिजन टोटेनहमलाई च्याम्पियन्स लिगको फाइनलसम्म पुर्याएका थिए । जुन उनको प्रशिक्षणमा सबैभन्दा ठुलो नतिजा हो । लिभरपुलसँग पराजित हुँदै टोटनह्याम उपविजेतामा सिमित बनेको थियो । यो सिजन लिग कपमा टोटेनहम तेस्रो डिभिजनको कोलचेस्टरसँग तथा च्याम्पियन्स लिगको समूह चरणमा पनि बायर्न म्युनिखसँग आफ्नै मैदानमा ७–२ को पराजित भएको थियो ।

टोटेनहममा आएको पहिलो सिजन टोटेनहमलाई पाँचौं स्थान दिलाएका ४७ वर्षे पोचेटिनोले दोस्रो सिजन तेस्रो स्थान दिलाए । उनी इंग्ल्याण्डमा पेप गुआर्डिओलालाई इंग्ल्याण्डमा हराउने पहिलो प्रशिक्षक बने । सन् २०१६ को अक्टोबरमा टोटनह्यामले सिटीलाई २–० ले हराएको थियो ।

पोचेटिनोलाई बर्खास्त गरेपछि सहायक प्रशिक्षक जेसस पेरेज, मिगेग डि अगस्टिनो र एन्टोनी जिमिनेजले पनि क्लब छोडेका छन् । उनको स्थानमा टोटनह्यामले जोसे मोरिन्होलाई ल्याउने तयारी गरेको छ । मोउरिन्होसँग प्रारम्भिक छलफल सुरु भइसकेको र केहि दिनमा नै निर्णय हुने क्लबनिकट स्रोतले जनाएका छन् ।