ढाका (एजेन्सी)– नेपाली प्रशिक्षक बालगोपाल महर्जनको बंगलादेशी क्लब ब्रदर्श युनियनको यात्रा वाल्टन फेडेरेसन कपको क्वार्टरफाइनलमा रोकिएको छ । बंगबन्धु राष्ट्रिय रंगशालामा आइतबार भएको खेलमा अवानी लिमिटेडसँग २–१ ले पराजित भएपछि अन्तिम आठबाट बाहिरिएको थियो । बंगबन्धु त्यहि रंगशाला हो जहाँ महर्जनको प्रशिक्षणमा नेपाली टोलीले छ महिना अघि बंगबन्धु गोल्डकप फुटबल प्रतियोगिता उपाधि जितेको थियो ।
राष्ट्रिय टोलीका प्रमुख प्रशिक्षकका रुपमा महर्जनको त्यो पहिलो प्रतियोगिता थियो । महर्जनको टोलीले आइतबार ३६ औं मिनेटमा अग्रता जोगाउन सकेन । वाल्सनले पहिलो गोल गरेका थिए । जेवेल रानाले् ६९ औं मिनेटमा बराबरी गोल गरे भने सन्डे चिजोबाले खेल सकिनु १० मिनेट अघि निर्णायक गोल गरे । समूह चरणमा लगातार दुई खेल जित्दै महर्जनको टोली अघि बढेको थियो । शेख जमाल धनमुन्डी क्लबलाई २–१ ले हराउनु अघि उनको टोलीले उत्तर बरिधारालाई १–० ले पराजित गरेको थियो । हालै ए कोचिङ कोर्स उर्तिर्ण गरेका महर्जन दुई साताअघि ब्रदर्श युनियनको जिम्मेवारी सम्हाल्न गएका थिए ।
अर्को महिना सुरु हुने बंगलादेशको प्रिमियर लिगमा उच्च प्रदर्शन गर्ने अपेक्षासहित आफु क्लबमा आबद्ध भएको महर्जनले बंगलादेश जानुअघि बताएका थिए । महर्जनले मासिक १ हजार ५ सय अमेरिकी डलर पाउँछन् ।
