एजेन्सी – इंग्लिस प्रिमियर लिग फुटबलमा म्यानचेस्टर सिटीले लन्डन क्लब चेल्सीलाई पराजित गरेको छ । घरेलु टोली सिटीले चेल्सीमाथि २–१ को जित निकालेको हो ।

 

सिटीको जितमा केभिन डि ब्रुयन र रियाद महारेजले गोल गरे । चेल्सीका एङ्गोलो कान्टेले गोल गरे । सिटीले एक गोलले पछि परेको स्थिति उल्ट्याएर जित निकालेको हो ।

इतिहाद् स्टेडियममा शनिबार राति भएको खेलमा शुरुवाती अग्रता चेल्सीले लिएका थियो । २१औं मिनेटमा कान्टेले माटियो कोभासिसको पासमा गोल गर्दै चेल्सीलाई अग्रता दिलाएका थिए । तर, चेल्सीको त्यो अग्रता लामो समय टिकेन । २९औं मिनेटमा केभिन डि ब्रुयनले बराबरी गोल फर्काए ।

३७औं मिनेटमा रियाद महारेजले गोल गर्दै घरेलु टोली सिटीलाई खेलमा २–१ को अग्रता दिलाए । दोस्रो हाफमा पनि दुवै टोलीले पाएको केही अवसर खेर फाल्दा सिटी खेलमा २–१ ले विजयी रहन सफल भयो । इन्ज्युरी समयको थप गरिएको तेस्रो मिनेटमा रहिम स्ट्रलिङले गोल गरेपनि भिएआरको सहायताले गोलले मान्यता पाएन ।

जितसँगै सिटी लिगको तेस्रो स्थानमा उक्लिएको छ । सिटीको १३ खेलबाट २८ अंक रहेको छ । पराजित चेल्सी चौथो स्थानमा झरेको छ । चेल्सीको १३ खेलबाट २६ अंक छ । शीर्षस्थानको लिभरपुलको ३७ अंक छ । लेस्टर सिटी २९ अंकसहित दोस्रो स्थानमा छ ।