अमेरिकामा भइरहेको कोपा अमेरिका २०१६को पहिलो सेमिफाइनलमा आयोजक राष्ट्रलाई ४-०ले हराउँदै अर्जेन्टिना फाइनलमा पुगेको छ।
इजेक्वेल लाभेजीको तेश्रो मिनेटको गोलबाट अगाडी बढेको अर्जेन्टिनाका लागि गोन्जालो हिगुएनले दुई र लियोनेल मेसीले एक गोल गरे। मेसीले ३२औं मिनेटमा गोल गर्दै टिमलाई २-०ले अघि बढाएका थिए। उनले फ्रिकिक मार्फत गोल गरेका थिए।
हिगुएनले दोश्रो हाफमा दुई गोल थपेर अर्जेन्टिनालाई लगतार दोश्रो वर्ष फाइनल पुर्याएका हुन्। उनले ५०औं र ८६औं मिनेटमा गोल गरेका थिए।
अर्जेन्टिनाले अब फाइनलमा कोलम्बिया र गत वर्षको विजेता चिलिको सेमिफाइनलको विजेतासंग भिड्नेछ। उक्त सेमिफाइनल खेल भोली हुने भएको छ।
