काठमाडौं (हाम्रो खेलकुद) – कप्तान सुजल श्रेष्ठको गोलमा नेपालले १३ औं दक्षिण एसियाली खेलकुद (साग) अन्तर्गत पुरुष फुटबलमा श्रीलंकाविरुद्ध अग्रता लिएको छ ।
पहिलो हाफमा सुजलकै गोलमा नेपालले १-० ले अगाडि बढेको छ । उनले पेनाल्टीमार्फत गोल गर्दै नेपाललाई अग्रता दिलाए । श्रीलंकाली डिफेन्डरले एक्रोब्याटिक क्लियर गर्ने क्रममा अनन्त तामाङको टाउकोमा हानेपछि नेपालले पेनाल्टी पाएको थियो ।
नेपालले खेलको सुरुवाती समयमा आकर्षक मुभ बनाउन सकेको थिएन । पहिलो हाफको मध्यतिर नेपालले बलमा पकड जमाउन थालेपछि श्रीलंकाली गोलरक्षकले केहि सुन्दर बचाउ पनि गरे । तर अग्रता लिएपछि भने श्रीलंकाले दवाव कायम गर्न सकेको छैन ।
पहिलो हाफको अन्त्यतिर नेपालका गोलरक्षक विकेश कुथुले पनि एक राम्रो बचाउ गरेका थिए । लगातार दोस्रो जितको खोजिमा रहेको नेपालले पहिलो खेलमा भुटानलाई हराएको थियो ।
