काठमाडौं (हाम्रो खेलकुद)– नेपाल पुलिस क्लबका प्रशिक्षक अन्ततराज थापाले कतार एयरवेज सहिद स्मारक ए डिभिजन लिगका हरेक खेललाई नकआउटका आधारमै लिएको बताएका छन् ।

‘हामी अहिले टोली निर्माणकोको क्रममा छौं । जितले ड्रेसिङ रुपलाई मोटिभेसन दिन्छ । थप उर्जा मिलेको हुन्छ,’ लिगमा बुधबार संकटा क्लबलाई २–१ ले हराएपछि प्रशिक्षक थापाले भने,‘ लिग भएपनि हामी हरेक एउटा खेललाई लिएर योजना बनाउँछौं , नकआउट जसरी खेलिरहेका छौं ।’

पछिल्लो दुई खेलमा लगातार जितेपछि उत्साहित देखिएका थापाले यो प्रदर्शनलाई निरन्तरता दिन सके अंक तालिकामा राम्रो स्थानमा लिग टुंगाउने आशा रहेको बताए । बराबरीबाट लिगको सुरुवात गरेको पुलिस अर्को खेलमा रुस्लान थ्री स्टार क्लबसँग १–० ले पराजित भएको थियो । यसअघिको खेलमा सरस्वती क्लबलाई हराउँदै पुलिसले पहिलो जित निकालेको थियो ।

संकटाविरुद्ध समयमा गोल निस्केकोले जित सम्भव भएको थापाले सुनाए । ‘स्कोर टाइममा निस्क्यो । हुन त हामीले गोल पनि लगत्तै खायौं । त्यसपछि अर्को गोल पनि समयमै निस्क्यौं,’ उनले खेलको विश्लेषण गर्दै भने,‘ हामीले लिगमा सबै टोलीलाई सम्मान गर्नै पर्छ । संकटाको बलियो पक्षलाई ध्यानमा राखेर योजना बनाएका थियौं । सुमन सुवेदीलाई उतारेका थियौं । तीनवटा लिबेरो खेलाउने निर्णय सायद टर्निङ प्वाइन्ट रह्यो ।’

लामो समयपछि अघिल्लो खेलमा पुनरामगन गरेका रविन श्रेष्ठ बुधबारको खेलमा थिएनन् । ‘सरस्वतीको खेलमा सामान्य घाइते भए । त्यसले आज खेलेनन्,’ थापाले भने,‘ सम्भवत अर्को खेलमा आउँछन् ।’ सुमन लामाले पहिलो हाफमा गरेको २ गोलको मद्दतमा पुलिस विजयी भएको थियो । उनले १५ औं र ३३ औं मिनेटमा गोल गरेका थिए । १८ औं मिनेटमा संकटाका लागि अमितले पेनाल्टीमा गोल फर्काएका थिए ।

संकटाका प्रशिक्षक विजय महर्जनले टोलीले ४ खेलमा सबैभन्दा खराब पुलिसविरुद्ध खेलेको बताए । ‘सायद दबाबमा परेर होला । हामीले लिगको सबैभन्दा खराब खेल्यौं,’ उनले भने,‘ यस्तो प्रदर्शनले आउने खेललका लागि पनि दबाब पर्छ ।’ ४ खेलमा संकटाको ४ अंक छ ।