प्रकाश तिमल्सिना, काठमाडौं

१२ औं दक्षिण एसियाली खेलकुद (साग) को फुटबलमा नेपालले स्वर्ण पदक जितेको अबको डेढ महिनामा चार वर्ष पुरा हुँदैछ । भारतले नेपालमाथि नाकाबन्दी गरेको केहि महिनापछि गुवाहाटी र सिलोङमा १२ औं साग आयोजना भएको थियो ।

फुटबलको फाइनलमा नेपाल र भारतबीच प्रतिस्पर्धा तय थियो । फाइनलमा भारतलाई हराउँदै स्वर्ण पदक जितेर नाकाबन्दीको बदला लिनुपर्ने दबाब नेपाली टोलीमाथि थियो । तर नेपाल पहिलो हाफमै १–० ले पछि पारेको थियो । त्यस्तो अवस्थाबाट नेपाल खेलमा फर्कन सफल भयो । दोस्रो हाफमा नेपालको नाममा रह्यो ।

६५ औं मिनेटमा प्रकाश बुढाथोकीले बराबरी गोल गरेका थिए । त्यसको ५ मिनेटपछि नवयुग श्रेष्ठले गोल गरे । त्यहि गोल निर्णायक बन्यो र यू २३ सागमा खेल्न थालेको सागमा नेपाल पहिलो पटक च्याम्पियन बन्यो । त्यो गोलले नेपाललाई स्वर्ण पदक त दिलायो नै उनले जसरी गोल गरे त्यसले उनलाई लामो समय चर्चामा राख्यो । उनले हावामा उडेर गरेको त्यो गोलको अहिले पनि बेला बेलामा स्मरण गरिन्छ ।

त्यस्तै स्मरण ताजा गर्ने गरि उनले रुस्लान थ्री स्टार क्लबविरुद्ध जारी कतार एयरवेज सहिद स्मारक ए डिभिजन लिगमा बुधबार गोल गरे । ५४ औं मिनेटमा पेनाल्टी बक्समा कप्तान भरत खवासले दिएको क्रसमा तत्काल रियाक्ट गर्ने क्रममा त्यसरी नै हावामा उडेर बललाई नवयुगले पोष्टको दिशा दिए । शक्तिशाली त्यो बलमा उनको कनेक्ट टाइमिङ पर्फेट थियो । सागमा गरेको त्यो निर्णायक गोलसँग बुधबार थ्री स्टारविरुद्धको गोल तुलना त हुन सक्दैन । तर, त्यो गोललाई एकपटक फेरि ताजा भने पक्कै गराएको छ ।

खेलपछि नवयुगले भने, ‘त्यो निकै माथि थियो । यो बल त्यति माथी थिएन ।  उचाईका हिसाबले त होइन तर जसरी गोल भयो, त्यो लगभग मिल्दो जुल्दो थियो ।’

जारी लिगमा गोलका लागि संघर्ष गरिरहेका नवयुग थ्री स्टारविरुद्ध गोल गर्न सक्दा दंग थिए । सन्तोष तामाङ नहुँदा मिडफिल्डमा दबाब रहेको स्वीकार्दै उनले भने, ‘एउटा खेलमा त मैले पनि मिडफिल्ड खेले । तर सन्तोष फर्केपछि खेल नै अर्को भयो । हामीले धेरै भन्दा धेरै बल पायौं ।’ अनुशासन तोडेको अभियोगमा डेढ महिनाको निलम्बन पछि सन्तोष बुधबारको खेलमा फर्किएका थिए । दोस्रो गोल उनै सन्तोषले गरेपछि आर्मीले थ्री स्टारमाथि २–० को जित निकालेको थियो ।

 

थ्री स्टारविरुद्धको खेलमा आफ्नो टोली निकै लयमा देखिएको उनले सुनाए । खेलपछि उनले भने, ‘मैले खेलकै दौरान साचें । आज एकदम फास्ट गेम थियो । दर्शकलाई आज खेलको टिभिमा हाइलाइट जस्तो लागेको होला जस्तो मैले महसुस गरेको थिए । आजको खेलमा हामीले निकै राम्रो खेल्यौं ।’

नवयुग साग वा त्यसअघिको जस्तो फर्ममा त्यसपछि कहिल्यै रहेनन् । उनले १२ औं सागमा फाइनलमा निर्णायक गोल गर्नुअघि समूह चरणमा भुटान र सेमिफाइनलमा माल्दिभ्सविरुद्ध ह्याट्रिक गरेका थिए । त्यसअघि बंगबन्धु गोल्डकपमा माल्दिभ्सविरुद्धको खेलमा पनि ह्याट्रिक गरेका थिए ।

अहिले भने कथा फरक भइसकेको छ । आर्मीका प्रशिक्षक नवीन न्यौपानेले उनीमाथि भरोसा गरिरहँदा राष्ट्रिय टोलीका पहिलो रोजाईमा पर्न भने नवयुगले संघर्ष गर्नुपरिरहेको छ । उनले भने, ‘नयाँ भाईहरुले पनि राम्रो गरिरहेका छन् । त्यसैले मौका कम पाइन्छ । फुटबलमा यो स्वभाविक हो ।’

यो पनि पढ्नुहोस् : ‘नरोएको दिन थिएन’