काठमाडौं (हाम्रो खेलकुद) – नेपाली राष्ट्रिय फुटबल टोलीका रक्षक दिनेश राजवंशीले सहिद स्मारक ‘ए’ डिभिजन लिगको अन्तिम खेल खेल्ने भएका छन् । दिनेशले अखिल नेपाल फुटबल संघ (एन्फा) को ९० दिनको प्रतिबन्ध फुकुवा भएसँगै लिगको अन्तिम खेल खेल्न पाउने भएका हुन् ।

दिनेश यसै सिजन थ्री स्टारबाट च्यासलमा अनुबन्धित भएका थिए । उनी ९० दिनको निलम्वन फुकुवापछि शुक्रबार थ्री स्टारविरुद्धको खेलमा उत्रने च्यासल युथ क्लबका अध्यक्ष रमेश व्यन्जनकारले जानकारी गराए । दिनेशले एन्फाबाट निलम्वन फुकुवाको पत्र लिइसकेको र उनी थ्री स्टारविरुद्धको खेलमा उत्रने पक्का रहेको अध्यक्ष व्यन्जनकारले थपे ।

दिनेशको आगमनँगै च्यासलको रक्षापङ्ति थप मजवुत हुनेछ । थ्री स्टार र च्यालसबीचको खेल शुक्रबार मध्यान्ह १२ः१५ बजे एन्फा कम्प्लेक्स सातदोबाटोमा हुनेछ ।

विश्वकप छनोट अन्तगर्त कुवेतविरुद्ध मंसिर ३ गते भुटानमा खेल्न जानु अघिल्लो रात डिस्कोमा बिताएका कारण एन्फाले उनीहरुमाथि एन्फाले कारवाही गरेको थियो । बिमल, अन्जन विष्टसँगै दिनेश र सन्तोष तामाङ डिस्को काण्डमा मुछिएपछि उनीहरुलाई एन्फाले निलम्वनसँगै ५० हजार जरिवाना सुनाएको थियो ।

एकै घटनामा एन्फाले अन्जन र सन्तोषलाई ४५ दिनको तथा बिमल र दिनेशलाई ९० दिनको प्रतिबन्ध सुनाएको थियो । प्रतिबन्ध फुकुवासँगै बिमलले लिगको उपाधि होडमा रहेको मछिन्द्रबाट खेल्ने पक्का भएको छ । मनाङ मर्स्याङ्दी क्लबका अन्जन विष्ट र त्रिभुवन आर्मी क्लबका सन्तोष तामाङ ४५ दिनको निलम्बन फुकुवा भएर घरेलु लिगमा फर्केको डेढ महिना भइसकेको छ । उनीहरुले लिगमा उच्च प्रदर्शन गरिरहेका छन् ।

यो पनि पढ्नुहोस् : विमलले लिगको अन्तिम खेल खेल्ने !