काठमाडौं (हाम्रो खेलकुद)– राष्ट्रिय महिला टोली एवंम एपिएफकी की फरवार्ड सावित्रा भण्डारी सम्मिलित गोकुलम केराला फुटबल क्लबले भारतीय महिला लिग (आईडब्लूएल) को फाइनलको पहिलो हाफमा अग्रता लिएको छ ।

बैंगलोर रंगशालामा जारी खेलको पहिलो हाफमा गोकुलमले क्रिप्सा एफसीविरुद्ध २–१ को अग्रता बनाएको छ । दोस्रो मिनेटमा पर्मेश्वरी देवीको गोलबाट अग्रता लिएको गोकुलमका लागि २५ औं कमलादेवीले गोल थपेकी थिइन् । ३४ औं मिनेटमा क्रिप्साका लागि कप्तान दाङमय ग्रसले गोल फर्काएकी थिइन् ।

प्ले अफ चरण पार्दै अघि बढेको गोकुलम अपराजित रहँदै फाइनल पुग्दा सावित्राले उच्च प्रदर्शन गरेकी थिइन् । सावित्राले लिगका यसअघिका सबै ६ खेलमा गोल गरेकी थिइन् । उच्च गोलकर्ताको शीर्षस्थानमा रहेकी सावित्राले १५ गोल गरिसकेकी छिन् । प्ले अफमा पनि उनले ३ गोल गरेकी थिइन् ।

सावित्राको टोलीले उनको राष्ट्रिय टोली तथा एपिएफकै सहकर्मी अनिता बस्नेत सम्मिलित सेथु एफसीलाई ३–० ले पराजित गरेको थियो । सावित्राले पनि अनितासँगै गत सिजन सेथुबाट खेलेकी थिइन् । त्यति बेला टोलीलाई च्याम्पियन बनाउने क्रममा सावित्राले १५ गोल गरेकी थिइन् । सावित्राले सोमबार भएको सेमिफाइनलमा दुवै हाफमा समान गोल गरेकी थिइन् ।