हिमाल खरेल, झापा

सहिद स्मारक ए डिभिजन लिग विजेता सानमिगेल मछिन्द्र क्लब गोर्खा ब्वाइज स्पोर्टिङ क्लब बुटवललाई २–१ ले पराजित गर्दै झापाको झिलझिलेमा जारी तेस्रो सताक्षी गोल्डकपको सेमिफाइनलमा प्रवेश गरेको छ ।

खेलमा सुरुवाती अग्रता गोर्खा ब्वाइजले लिएपनि जित निकाल्न भने सकेन । खेलको १६ औं मिनेटमा गोर्खा ब्वाइजका काजिमले गोल गर्दै टिमलाई अग्रता दिलाए । उनले ओलाकेजीको पासलाई गोलमा परिणत गरेका थिए । मच्छिन्द्रले खेलको २५ औं मिनेटमा खेललाई बराबरीमा ल्यायो । रञ्जित धिमालले गरेको कर्नर प्रहारलाई विदेशी खेलाडी आन्द्रेस नियाले गोलमा परिणत गरे ।

त्यसको ८ मिनेटपछि नै मच्छिन्द्रले अग्रता दोब्बर बनायो । पेनाल्टी क्षेत्रभित्र सरोज योञ्जनले ह्याण्ड गरेपछि मछिन्द्रका फरवार्ड विमल घर्तीमगरले गोलमा परिणत गरे । त्यसपछि खेलमा दुवै टिमले गरको केही उत्कृष्ट प्रहार खेर गएका थिए ।

पहिलो हाफको सुरुवाती सयममा मछिन्द्रका विशाल राई ‘ए’ ले गरेको प्रहार फितलो हुँदा गोलमा परिणत हुन सकेन । खेलको २१ औं मिनेटमा मछिन्द्रका विराज महर्जनको प्रहार गोलरक्षक सोजित गुरुङले सहजै बचाएका थिए । २४ औं मिनेटमा गोर्खा ब्वाइजका ओलाकेजीको प्रहार बार नजिकैबाट बाहिएिको थियो भने ३९ औं मिनेटमा काजिमको प्रहार फितला रह्यो ।

७६ औं  मिनेटमा गोर्खा ब्वाइजको प्रहारलाई मछिन्द्रका विदेशी खेलाडी एडेलाजिया सोमिडेले हेडमार्फत उत्कृष्ट बचाउ गरे । खेलमा उत्कृष्ट प्रदर्शन गरेका मछिन्द्रका विमल घर्तीमगर म्यान अफ द म्याच घोषित भए । उनले नगद १० हजार प्राप्त गरे । मछिन्द्रले फाइनल प्रवेशका लागि विभागीय टोली त्रिभुवन आर्मी क्लबको सामना गर्नेछ ।

सतासीधाम स्पोर्टिङ क्लबको आयोजनामा भएको खेलमा ए डिभिजन लिग विजेता मच्छिन्द्रले गोल्डकपमा सुखद् सुरुवात गरेको हो । प्रतियोगिता अन्तर्गत बिहीबारबाट सेमिफाइनलका खेलहरु हुनेछ । सेमिफाइनलको पहिलो खेल आयोजक सतासीधाम स्पोर्टिङ क्लब झापा र थ्री स्टार क्लबबीच हुनेछ । क्वाटरफाइनलमा आयोजकले मनाङ मर्स्याङ्दी क्लबलाई पराजित गरेको हो भने थ्री स्टारले बेलबारी फुटबल क्लब मोरङलाई पराजित गरेको थियो ।