काठमाडौं (हाम्रो खेलकुद) – राष्ट्रिय महिला टोली एवंम एपिएफकी फरवार्ड सावित्रा भण्डारी अर्को साता भारत जाने भएकी छिन् । गोकुलम केरला एफसीलाई भारतीय महिला लिग (आईडब्लूएल) च्याम्पियन बनाउन महत्वपूर्ण भूमिका खेलेकी सावित्रा टोलीको विजयउत्सवमा सरिक हुन त्यसतर्फ जान लागेकी हुन् ।
अर्को शनिबार विजयउत्सव मनाउने तयारीमा आफुलाई बोलिएको सावित्राले हाम्रो खेलकुदलाई जानकारी दिइन । सावित्रा शुक्रबार केरेला जानेछिन् । गत साता टोलीलाई च्याम्पियन बनाउँदै सावित्रा आइतबार स्वदेश फर्केकी थिइन् ।
शुक्रबार भएको फाइनलमा क्रिप्सा एफसीलाई ३–२ ले हराउँदै सावित्रा सम्मिलित गोकुलम केरला एफसी लिग उपाधि जितेको थियो । सावित्राको निर्णायक गोलमा गोकुलम च्याम्पियन बनेको थियो । २–२ को बराबरीको अवस्थाबाट सावित्राले खेल सकिन ३ मिनेट बाँकी रहँदा निर्णायक गोल गर्दै टोलीलाई च्याम्पियन बनाएकी हुन् । लिग अवधिभर गोकुलमको सबै जितमा सावित्रा केन्द्रमा रहिन् ।
टोलीले खेलेका लिगका सबै ७ खेलमा सावित्राले गोल गरिन् । उनले लिगभर १६ गोल गरिन् । त्यसअघि प्ले अफमा पनि उनले ह्याट्रिक गरेकी थिइन् । लिगको उच्च गोलकर्ता बनेकी सावित्राले १ लाख भारतीय रुपैयाँ प्राप्त गरेकी थिइन् ।
