नवलपुर (हाम्रो खेलकुद) – विभागीय नेपाल पुलिस क्लब नवलपरासीमा जारी पाँचौ राइनो कप फुटबल प्रतियोगिताको सेमिफाइनलमा प्रवेश गरेको छ ।

शुक्रबार विजय युथ क्लब हेटौडालाई ३–१ ले पराजित गर्दै पुलिस राइनो गोल्डकपको अन्तिम चारमा पुग्न सफल भएको हो । पुलिसले बिहीबार मात्रै भरतपुर फुटबल क्लबलाई ३–१ ले पराजित गर्दै क्वाटरफाइनलमा स्थान बनाएको थियो ।

पुलिस २४ घन्टाकै अवधिमा दोस्रो जित निकाल्दै अन्तिम चारमा पुग्न सफल भएको हो । पुलिसको सेमिफाइनल यात्रामा निरकुमार राई, रवि पासवान र बुद्ध बल तामाङले गोल गरे । विजय युथ क्लबका लागि हम्जातले एक गोल फर्काए ।

खेलको चौथो मिनेटमा नै निर कुमार राईको गोलबाट पुलिसले खेलमा अग्रता बनाएको थियो । १८औं मिनेटमा रवि पासवानले गोल गर्दै पुलिसको अग्रता दोब्बर बनाए । पहिलो हाफको इन्ज्युरी समयको थप गरिएको तेस्रो मिनेटमा हम्जातले पेनाल्टीमा गोल गर्दै खेललाई २–१ को स्थितिमा ल्याएका थिए ।

हम्जातले एक साता अघि सकिएको लिगमा थ्री स्टारबाट खेलेका थिए । लिग सकिएपछि हम्जात थ्री स्टारसँगको भ्रमणमा रहेका छैनन् । थ्री स्टार झापा झिलझिलेमा जारी सताक्षी गोल्डकप उपाधि नजिक छ ।

५३औं मिनेटमा बुद्ध बल तामाङले गोल गरेपछि पुलिसको जित निश्चित जस्तै बनेको थियो । त्यसपछि थप गोल निस्कन नसक्दा पुलिस ३–१ ले विजयी हुन सफल भयो । पुलिसका निर कुमार राई खेलको म्यान अफ दि म्याच घोषित भए ।

प्रतियोगितामा शनिबार यति हिमालयन शेर्पा क्लब र इन्द्रेणी एकीकृत बिकास केन्द्र कास्कीबीच प्रतिस्पर्धा हुने आयोजकले जनाएको छ । नवलपरासी मध्यविन्दु ४ को राइनो क्लबको आयोजनामा जारी प्रतियोगिताको विजेताले १० लाख र दोस्रो हुनेले ५ लाख रुपैयाँ हात पार्नेछन् ।