एजेन्सी – लेस्टर सिटी इंग्लिस प्रिमियर लिगमा रेलिगेसन जोनमा रहेको नर्विच सिटीसँग स्तब्ध बनेको छ । लेस्टर घरेलु टोलीसँग १–० ले स्तब्ध बनेको हो ।

क्यारो रोड नोरफल्क नर्विचमा शुक्रबार राति भएको खेलमा लेस्टरलाई स्तब्ध बनाउन जमल लेविसले खेल सकिन २० मिनेट बाँकी रहँदा गरेको गोल नै निर्णायक बन्यो । लेस्टरले पछिल्ला ५ खेलमा जित निकाल्न सकेको छैन । हारसँगै लेस्टरले दोस्रो स्थानमा रहेको म्यानचेस्टर सिटीसँगको अंक दुरी छोट्याउने मौका गुमाएको छ । यस्तै लेस्टरले प्रिमियर लिगमा शीर्ष चारमा पर्ने सम्भावना बलियो बनाउने मौका गुमाएको छ । लेस्टरको २७ खेलबाट ५० अंक छ । एक खेल कम खेलेको चेल्सीको ४४ अंक छ । लेस्टरलाई हराएको नर्विच २१ अंक जोडेर पुछारमा यथावत छ ।

घरेलु टोलीलाई दवावमा राखेपनि लेस्टरले नर्विचको बलियो रक्षापङ्ति तोड्न सकेन । खेलको आठौं मिनेटमा जमल लेविसको फ्रि हेडर सदुपयोग भएन । २०औं मिनेटमा डेनिस प्राएटको हाफ भली प्रहार नर्विचका गोलरक्षक टिक क्रुलले नियन्त्रणमा लिए । २६औं मिनेटमा हारभे वार्नेसको पासमा रिकार्डाे पेरेराको प्रहार क्रसबारमा लागेर फर्कदा लेस्टर अग्रता लिनबाट चुक्यो । त्यसपछि पनि लेस्टरले तीन सुन्दर मौको खेर फालेको थियो ।

दोस्रो हाफको शुरुमै लेस्टरका केलिची इहानाचोले गोल गरेपनि भिएआरबाट मान्यता पाएन । उनले गोल गर्नुअघि भिएआरमा ह्यान्ड देखिएको थियो । नर्विचलाई लगातार दवावमा राखेको लेस्टरले ७०औं मिनेटमा गोल खान पुग्यो । म्याक्स आरोन्सको क्रसमा जमल लेविसले गोल गर्न सफल भएका थिए । त्यसपछि थप गोल निस्कन नसक्दा लेस्टर घरेलु टोलीसँग १–० ले स्तब्ध बन्न पुग्यो ।