काभ्रेपलाञ्चोक (हाम्रो खेलकुद)- दोस्रो संस्करणको काभ्रे गोल्डकप  चैतमा आयोजना हुने भएको छ । आयोजक काभ्रे जिल्ला फुटबल संघले शनिबार पत्रकार सम्मेलनको आयोजना गर्दै प्रतियोगिताको दोस्रो चैत १३ देखि २३ गते सम्म हुने जानकारी गराएको हो ।

आयोजकले दोस्रो संस्करणको काभ्रे गोल्डकपको तयारी शुरु भइसकेको जनाएको छ । प्रतियोगितामा ‘ए’ डिभिजनका टोलीसहित १० टोलीको सहभागिता रहने काभ्रे गोल्डकपका मुख्य संयोजक अमित खोजु श्रेष्ठले जानकारी गराए ।

प्रतियोगिताको लागि धुलिखेल, बनेपा, पनौती, पाँचखाल, मण्डनदेउपुर, नमोबुद्ध नगरपालिकासँगै रोशी, भुम्लु, तेमाल, बेथानचोक, महाभारत, खानिखोला, चौरीदेउराली गाँउपालिकाले सहयोग गरेका छन् ।

जिल्लाकै सर्वाधिक धन राशिको प्रतियोगिताको विजेताले ६ लाख तथा उपविजेताले ३ लाख रुपैया हात पार्नेछन् । प्रतियोगिताको अनुमानित लागत ५० लाख रुपैया रहेको छ । खेलहरु धुलिखेल रंगशालामा हुनेछ ।

पत्रकार सम्मेलनमा नेपाल पत्रकार महासंघ काभ्रेका अध्यक्ष मोतीराम तिमल्सिना, अखिल नेपाल फुटबल संघ (एन्फा) का केन्द्रिय सदस्य एवं राष्ट्रिय रेफ्रि संयोजक रविन्द्रनाथ श्रेष्ठ, काभ्रे जिल्ला फुटबल संघका बरिष्ठ उपाध्यक्ष एवं प्रथम काभ्रे गोल्ड कपका मुख्य संयोजक निरोज श्रेष्ठ, सचिव जयोज नर्सिङ्ग श्रेष्ठ, कोषाध्यक्ष प्रभात श्रेष्ठ, फिफा रेफ्री माधव केसी, सल्लाहकार कञ्चन नापित लगायतको उपस्थित थियो ।