एजेन्सी – चीनबाट फैलिएको कोरोना भाइरस (कोभिड–१९) का कारण अहिले विश्व नै नराम्रोसँग थलिएको छ । भीडभाड जन्य ठुला कार्यक्रमहरु ठप्प पारिएका छन् । तर, पनि यो कोरोना भाइरस रोकिने छाँटकाट छैन । पछिल्लोपटक कोरोनाको गन्तव्य युरोप बनेको छ । युरोपमा पनि इटाली र स्पेन सबैभन्दा बढी प्रभावित छन् । 

इटालीमा पनि बेरगामो शहर यो भाइरसबाट बढी प्रभावित शहर हो । यसै शहरका मेयर जर्जियो गोरीले युइएफए च्याम्पियन्स लिगमा एटलान्टा र भ्यालेन्सियाबीच मिलानको सानसिरोमा भएको खेलकै कारण इटाली र स्पेनमा कोरोना भाइरसले महामारीको रूप लिएको दावी गरेका छन् ।

‘त्यो खेल मानवीय जैविक बमजस्तै रह्यो । त्यतिबेला कसैले पनि अनुमानसमेत गर्न सकेन । यो खेल हेर्न झन्डै ४४ हजार दर्शक रंगशालामा उपस्थित थिए । ४० हजार यसबाट संक्रमित भएको हुनु पर्छ । यो खेल हेरेपछि दुवै टिमका समर्थक आ–आफ्नो सहर फर्के र एकले अर्कोलाई भाइरस सार्ने काम गरे,’ गोरीले दावी गरेका छन् ।

त्यहाँका स्थानिय सिनियर चिकित्सकहरुले पनि त्यही खेल नै इटली र स्पेनमा वास्तवमै जैविक बम भएको ‘अफ द बल’ लाई भनेका छन् । फेब्रुअरी १९ को त्यस खेलसम्म इटालीमा यस भाइरसबाट कसैको पनि मृत्यु भएको थिएन । त्यसको तीन दिनपछि पहिलो मृत्यु देखेको इटालीमा तीन सातापछि सात दिनको अन्तरमा बेरगामोमा मात्र ३ हजार ३३ को यो भाइरसको संक्रमणकै कारण मृत्यु भयो ।

खेलमा क्रममा धेरै भन्दा धेरै समर्थक कोरोना भाइरसको संक्रमणमा आए । तिनैले आफ्नो परिवारमा सारेको अनुमान गरिएको छ । एटलान्टाका गोलरक्षक मार्को स्पोर्टटेलो पनि भाइरसबाट संक्रमित भएपछि क्वारेन्टाइनमा छन् । भ्यालेन्सियाका एक तिहाइ खेलाडी र खेल पदाधिकारी पनि भाइरसबाट संक्रमित भएका छन् । भ्यालेन्सियाका समर्थकले कोरना भाइरस आफूसँगै स्पेन लगेको अनुमान गरिएको छ ।

आफ्नो मैदान तयार नभएपछि मिलानस्थित सानसिरोमा खेलिएको खेलमा ४–१ को प्रभावशाली जित निकाल्दै एटलान्टा पहिलोपटक च्याम्पियन्स लिगको क्वाटरफाइनलमा पुग्न सफल भएको थियो । यही खेलपछि मात्र इटालीमा दर्शकविहीन बन्द रंगशालामा खेल्नेक्रम सुरु भएपनि स्थिति असमान्य बन्दै गएपछि लिग नै स्थगित गरिएको थियो । अहिले इटाली र स्पेनसँगै युरोपका सबै लिग स्थगित छन् । ती कहिले सुरु हुने हो टुंगो छैन ।