एजेन्सी – स्पेनिस क्लब एट्लेटिको मड्रिडका खेलाडी तथा प्रशिक्षकले आफ्नो ७० प्रतिशत पारिश्रमिक कटौतीमा क्लबसँग सहमत भएका छन् । क्लबले विश्वव्यापी बनेको कोरोना भाइरस (कोभिड–१९) का कारण हुन सक्ने आर्थिक संकटलाई ध्यानमा राख्दै यस्तो निर्णयमा पुगेको हो ।

एट्लेटिको खेलाडीको पारिश्रमिक कटौतीको निर्णय गर्ने दोस्रो स्पेनिस क्लब बनेको छ । यसअघि क्याटलान क्लब बार्सिलोनाले पनि खेलाडीको ७० प्रतिशत पारिश्रमिक कटौती गर्ने निर्णय गरेको थियो । जसमा खेलाडीले सहमति जनाएका थिए ।

एट्लेटिकोले आफ्नो क्लबको ४ सय ३० कर्मचारीलाई तलब वितरण गर्न सहजताको लागि आफ्ना खेलाडीको ७० प्रतिशत तलब कटौती गर्ने निर्णय गरेको र त्यसमा क्लबको सिनियर टोली, महिला टिम, बी टिम र प्रशिक्षकले क्लबसँग आन्तरिक सहमति गरेका एट्लेटिकोको आधिकारिक वेबसाईटमा उल्लेख छ । क्लबले सिजन पुरा हुने वा रद्ध हुने दुई फरक अवस्थाको विकल्पमा पनि छलफल गरेको छ ।

क्लबको पहिलो रोजाईका खेलाडीबाट पारिश्रमिकको आधा पारिश्रमिक छुट्याउने र आधा अन्यबाट गरी क्लबका कर्मचारीलाई दिइने क्लबका सिइओ मिगुइल एन्जल गिल मारिनले जनाएको छ । एट्लेटिकोमा बढी पारिश्रमिक लिनेमा प्रशिक्षक डिएगो सिमोनी र यसै सिजन महँगो मूल्यमा अनुबन्ध भएका युवा स्टार जोआओ फेलिक्स रहेका छन् ।