एजेन्सी – वेल्स विंगर ग्यारेथ बेललाई रियल म्याड्रिडमा आफ्नो सम्मान हुँदैन लाग्छ भने क्लब छाड्न उपयुक्त हुने म्यानचेस्टर युनाइटेड तथा टोटेनहम हट्स्परका पूर्व फरवार्ड डिमिटार बर्बाटोभले बताएका छन् । बर्बाटोभले बेलको क्षमता र योगदानका लागि रियलमा सम्मान पाउनुपर्ने तर्क गरेका छन् ।

‘रियलमा उनको प्रदर्शन र गोल साच्चै प्रभावशाली छन् । त्यसमा पनि केहि गोल अविश्वसनिय नै छन् , जुन औसतको खेलाडीले गर्न सक्दैन,’ बेर्बाटोभले भने, ‘उनले लिभरपुलविरुद्ध च्याम्पियन्स लिग फाइनलमा गरेको गोल हेरौं । उनको स्तर त्यहिबाट थाहा हुन्छ ।’

सम्मान नभएको ठाँउमा भने बस्ने उपयुक्त नहुने बेर्बाटोभले बताएका छन् । अर्को सिजन बेल प्रिमियर लिग टोली न्युक्यासल जाने सम्भावना रहेको बताइएको छ । तर, बेर्बाटोभ भने केहि शर्तमा मात्र ३० वर्षे बेल न्युक्यासल जानु उपयुक्त रहेको बताउँछन् ।

‘सम्मानका साथ भन्छु रियल र न्युक्यासलको तुलना हुन सक्दैन । यदि न्युक्यासल उनलाई लिन चाहन्छ भने टोलीमा देखिने गरि केहि हुनुपर्छ । यदि न्युक्यालले मारिसियो पोचेटिनोलाई प्रशिक्षकका रुपमा भित्राउँछ भने त्यो राम्रो सुरुवात हुनेछ ,’ उनले जोड दिदै भने,’ त्योसँगै अन्य कुन खेलाडी लिने योजना छ त्यो पनि बताउनु उपयुक्त हुन्छ । त्यो सबै अवस्थामा उनी जान सक्छन् । तर मलाई लाग्छ उनी रियलमै बस्नेछन् ।’