एजेन्सी – इंग्लिस क्लब चेल्सीले जर्मनी तथा जर्मन क्लब आरबी लाइप्जिगका फरवार्ड टिमो वेर्नरलाई क्लबमा अनुबन्ध गरेको छ । चेल्सीले २४ वर्षीय फरवार्ड वेर्नरलाई पाँच वर्षको लागि सम्झौता गरेको र जुलाईबाट टोलीमा सामेल हुने स्काई स्पोर्ट्सले जनाएको छ ।

जुलाईमा चेल्सी आउने भएसँगै वेर्नरले लाइप्जिगबाट च्याम्पियन्स लिगका खेल गुमाउने देखिन्छ । लाइप्जिग च्याम्पियन्स लिगको क्वाटरफाइनलमा प्रवेश गरेको छ । क्वाटरफाइनल देखिका खेलहरु पोर्चुगलको लिस्वनका १२ अगस्टदेखि २३ अगस्टसम्म हुदैछ ।  वेर्नर सम्झौताका लागि राजी भएको र मेडिकल बाँकी रहेको चेल्सीले जनाएको छ ।

वेर्नरले लाइप्जिगबाट यो सिजन ४३ खेलमा ३२ गोल र १३ गोलको लागि सहायता दिएका छन् । वेर्नरले जर्मन क्लबका लागि २०१६ देखि हालसम्म १५७ खेलमा ९३ गोल र ४० गोलका लागि पास उपलब्ध गराएका छन् । उनी यो सिजनको जर्मन बुन्डेस लिगाको सर्वाधिक गोलकर्ताको सुचीमा दोस्रो स्थानमा छन् । वेर्नरले २६ गोल गरेका छन् । उनीभन्दा अघि बायर्न म्युनिखका रोवर्ट लेवान्डोस्की (३१) छन् ।

यस्तै वेर्नरले जर्मनीका लागि २९ खेलमा ११ गोल गरेका छन् । उनी २०१७ देखि जर्मनीको राष्ट्रिय टोलीमा नियमित रहँदै आएका छन् ।

‘चेल्सीसँग सम्झौता गर्न पाउँदा खुसी छु । ठूलो क्लबको एक भाग हुन पाउँदा अत्यन्तै गर्वको महशुस गरेको छु,।’ ’चार वर्षे शानदार बसाईका लागि लाइप्जिग र समर्थकहरुलाई धन्यवाद दिन चाहन्छु । लाइप्जिग सधै मेरो मुटुमा हुनेछ,’ वेर्नरले भने ।

‘मैले अब अगाडि हेर्नुपर्नेछ । नयाँ सिजन नया टिम सहयात्री र नयाँ व्यवस्थापकका साथै अघि बढ्दैछु । चेल्सी समर्थकसँगै रहेर बाकी समयलाई सफलतापुर्वक बिताउनुपर्नेछ ।’