एजेन्सी – रियल म्याड्रिडका युवा फरवार्ड मार्को एसेन्सियोले बिहीबार ला लिगा अन्तर्गत भ्यालेन्सियाविरुद्ध खेलमा वैकल्पिक खेलाडीका रुपमा मैदान प्रवेश गर्दै चोटबाट पुनरागमन गरे ।

सिजनको सुरुवातमा अमेरिकाको वासिङ्गटनमा भएको मैत्रीपूर्ण खेलमा एसेन्सियोले गम्भीर चोट बोकेका थिए । चोटपछि पहिलो परिक्षणले नै उनी अब बाँकी सिजन खेल्न नसक्ने पक्का भएको थियो । तर उनको अथक मिहिनेत र कोरोनाका कारण सिजन केहि पछि सर्दा उनले पुनरागमन गर्न सफल भए ।

एसेन्सियोको पुनरागमन भने सामान्य थिएन । मैदान प्रवेश गरेको ३० सेकेन्ड पनि नबित्दै उनले गोल गरे । फर्लान्ड मेन्डीको क्रसलाई भलीमार्फत गोल गर्दै एसेन्सियोले रियलको जित पक्का गरे । उनले मैदानमा छोटो समय बिताएपनि रियलको जितमा गहिरो प्रभाव छाडे ।

गत सिजन फिटनेसमा समस्या भएपछि एसेन्सियोले युरोपेली अन्डर-२१ च्याम्पियनसिपबाट नाम फिर्ता लिएका थिए । उनले आफू रियालमा उत्कृष्ट लयमा रहनकै लागि यो निर्णय गरेका थिए । रियलमा उनले प्रि सिजनको खेलमा प्रभाव पनि जमाए । तर आर्सनलविरुद्ध खेलमा पिएर एमेरिक औबामेयाङसँग जुध्दा उनले गम्भीर चोट बोक्नुपर्यो ।

एसेन्सियोको घुंडाको क्रुसिएट लिगामेन्ट च्यातिएको थियो भने मेनिस्कसमा पनि असर परेको थियो । त्यसैले पनि उनले शल्यक्रियाको विकल्प देखेनन् । शल्यक्रियापछि उनले परिवारको निरन्तर साथ र रियलको मेडिकल टोलीको अथक प्रयासपछि पुनरागमनको बाटो बुने ।

एसेन्सियो शल्यक्रिया गरेको ३ सय ३० दिनपछि मैदान फर्केका छन् । उनले यसबीचमा घरमा, स्विमिङ पुल र जिममा निकै समय बिताए । जति मिहिनेत उनले आफ्नो पुनरागमनमा बिताए, त्यसको नतिजास्वरूप उनले पहिलो खेलमा नै गोल गर्न सफल रहे ।