एजेन्सी – युवा मिडफिल्डर फिल फोडेनले उत्कृष्ट प्रदर्शन गरेपछि म्यान्चेस्टर सिटीले इंग्लिस प्रिमियर लिग अन्तर्गत सोमबार राती बर्नलीमाथि ५-० को फराकिलो जित दर्ता गरेको छ ।

पहिलो रोजाईमा अवसर पाएका फोडेन र रियाद माहरेजले समान दुई गोल गर्दा अर्को गोल डेविड सिल्भाको नाममा रहयो । सिटीले पहिलो हाफमा नै ३-० को अग्रता लिएको थियो ।

खेलको २२ औं मिनेटमा फोडेनले गोल गर्दै सिटीलाई अग्रता दिलाएका थिए । डेविड सिल्भाको कर्नर पासमा फोडेनले पेनाल्टी क्षेत्र बाहिरबाट गरेको शक्तिशाली प्रहार सिधै गोलमा परिणत भएको थियो ।

४३ औं मिनेटमा रियाद माहरेजले अग्रता दोब्बर पारे । उनले फर्नान्डीन्होको पासलाई सदुपयोग गर्दै सुन्दर गोल गरेका थिए । इन्ज्युरी समयको तेस्रो मिनेटमा माहरेजले व्यक्तिगत दोस्रो गोल गरे । सर्जियो अगुएरोलाई बेन मीले फल गरेपछि रेफ्रीले पेनाल्टी दिएका थिए । उक्त पेनाल्टीको सदुपयोग गर्दै माहरेजले पहिलो हाफमा नै ३-० को अग्रता दिलाए ।

५१ औं मिनेटमा डेविड सिल्भाले गोल गर्दै सिटीलाई ४-० ले अगाडी बढाए । फोडेनको चलाखीपूर्ण पासलाई बर्नार्डो सिल्भाले सदुपयोग गर्दै डेविड सिल्भालाई पास दिएपछि डेविडले सहजै गोल गरेका थिए ।

फोडेनले ६३ औं मिनेटमा व्यक्तिगत दोस्रो गोल गर्दै फराकिलो जित सुनिश्चित गरे । डेविड सिल्भाको क्रसलाई ग्याब्रीएल जेससले गोल गर्ने प्रयास गरेपनि असफल हुँदा फार पोस्टमा रहेका फोडेनले पोस्टको दिशा दिएका थिए ।

यस जितसँगै सिटीले ३० खेलमा ६३ अंक जोड्दै लिभरपुलसँगको दुरी २० अंकमा झारेको छ । लिभरपुलको ३० खेलमा ८३ अंक रहेको छ । बर्नली भने ३० खेलमा ३९ अंकसहित ११ औं स्थानमा छ ।

अन्य खेलको नतिजा यस्तो रहयो :

रोनाल्डो र डिबालाको गोलमा युभेन्टसको जित

मिलानको सानदार जित