एजेन्सी – ब्राजिलियन युवा फरवार्ड भिनिसियस जुनियरको गोलमा रियल म्याड्रिडले बुधबार मालोर्काविरुद्ध जारि खेलको पहिलो हाफमा १-० को अग्रता लिएको छ ।

खेलको सातौं मिनेटमा नै मालोर्काका कप्तान तथा गोलरक्षक मानोलो रेइनाले एक मिनेटको अन्तरमा दुई उत्कृष्ट बचाउ गर्दै खेल बराबरीमा नै राखे । करीम बेन्जेमाले पेनाल्टी क्षेत्रभित्र छातीले बल नियन्त्रण गर्दै गरेको प्रहार रेइनाले विफल पारेका थिए । लगत्तै बेलले लामो दुरीबाट गरेको प्रहार पनि उनले बचाए ।

खेलको ११ औं मिनेटमा मालोर्काका इद्रिसा बाबाले पेनाल्टी क्षेत्र बाहिरबाट गरेको प्रहार रियलका गोलरक्षक थिबाउट कोर्टुवाले डाइभ दिँदै विफल पारे ।

खेलको १९ औं मिनेटमा रियलले युवा विंगर भिनिसियस जुनियरको गोलमा अग्रता लियो । लुका मोड्रीचले अफसाइड ट्रयाप बिट गरेर दिएको पासलाई भिनिसियसले ६ यार्ड बक्स नजिकबाट गोलरक्षकको माथिबाट चिप गरेका थिए ।

२४ औं मिनेटमा भिनिसियस रियल म्याड्रिड र व्यक्तिगत दोस्रो गोल गर्नबाट बन्चित रहे । बेन्जेमाको थ्रु पासलाई भिनिसियसले गोलरक्षकको माथिबाट चिप प्रहार गरेपनि बल क्रसबारमा लाग्दै फर्किएको थियो । फर्केर आएको बललाई उनले डिफेन्डरसँग जुध्दै हेडरमार्फत गोल गर्न भने सकेनन् ।

२७ औं मिनेटमा इडेन हाजार्डको प्रहारले पोस्टको दिशा लिन सकेन । ४२ औं मिनेटमा मोड्रीचको फ्रिकिकलाई गोलरक्षक रेइनाले पन्च गरेर खतरा टारे ।

रियलले यो खेल जितेमा अंक तालिकाको शीर्षस्थानमा उक्लनेछ । मालोर्का भने रेलिगेसन क्षेत्रबाट माथि उक्लने सम्भावना जीवित राख्न जित हासिल गर्न चाहन्छ ।

यो पनि पढ्नुहोस :

इन्टरको खेलमा ६ गोलको बराबरी

मार्सियलको ह्याट्रिकमा युनाइटेडको सहज जित